Kryetarja e Kuvendit të Kosovës, Albulena Haxhiu, ka marrë pjesë në ceremoninë e ndërrimit të komandës së KFOR-it, ku Gjeneralmajori Ozkan Ulutash ia dorëzoi detyrën pasardhësit të tij, Gjeneralmajorit Roberto Vergori.

Përmes një postimi në Facebook, Haxhiu ka shprehur mirënjohje për Ulutashin për bashkëpunimin me institucionet e Kosovës gjatë dy mandateve të tij.

Ajo ka theksuar se gjatë kësaj periudhe, Policia e Kosovës u përfshi në garantimin e sigurisë në hapësira ku për gati tri dekada ishte i pranishëm vetëm KFOR-i.

“Ky zhvillim dëshmon besimin në institucionet tona dhe sigurinë që është ndërtuar në Kosovë”, ka shkruar Haxhiu.

Ajo i ka uruar suksese komandantit të ri të KFOR-it, Roberto Vergori, duke e mirëpritur në Kosovë.

Haxhiu ka falënderuar gjithashtu Turqinë dhe Italinë për kontributin e tyre ndër vite në misionin e KFOR-it.

“Partneriteti me NATO-n mbetet shtyllë e sigurisë së Kosovës dhe e rrugës sonë euroatlantike”, ka shkruar ajo. /Lajmi.net/