Dogana e Kosovës ka konstatuar parregullsi në sistemin e plombimit të një mauneje që transportonte mallra për import në Pikën e Kalimit Kufitar në Vërmicë.

Rasti është zbuluar më 8 tetor 2026, gjatë kontrolleve të zakonshme doganore, ku zyrtarët kanë vërejtur se sistemi i plombimit mundësonte ndërhyrje edhe pas vendosjes së plombës, duke mos garantuar sigurinë e mallrave gjatë transportit, transmeton lajmi.net.

Sipas Doganës, gjatë procedurave të transitit, plombat duhet të sigurojnë paprekshmërinë e mallrave dhe të mundësojnë identifikimin e tyre deri në mbërritjen në destinacion.

Lidhur me rastin, është iniciuar procedurë kundërvajtëse doganore për mosrespektim të rregullave që kanë të bëjnë me transportin e mallrave nën mbikëqyrjen doganore.

Si rezultat i shkeljes së konstatuar, ndaj shoferit është shqiptuar gjobë në vlerë prej 500 eurosh.

Dogana e Kosovës ka bërë të ditur se do të vazhdojë kontrollet për zbatimin e legjislacionit doganor dhe parandalimin e parregullsive gjatë transportit të mallrave.