Kryetari i Parlamentit të Irakut i bëri thirrje Iranit që eksporteve irakiane të naftës që kalojnë përmes Ngushticës së Hormuzit t’u japë “status të veçantë”, gjatë një takimi me homologun e tij iranian të mërkurën, sipas agjencisë shtetërore irakiane të lajmeve, shkruan CNN.

Trafiku në këtë rrugë ujore kritike, përmes së cilës zakonisht kalon një e pesta e naftës bruto në botë, është reduktuar në nivele minimale që nga fillimi i luftës në shkurt.

Kryetari i Këshillit të Përfaqësuesve të Irakut, Haibat al-Halbousi, e bëri këtë propozim gjatë një takimi me kryetarin e Parlamentit të Iranit, Mohammad ⁠Bagher Ghalibaf, në Bagdad, gjatë një vizite për të cilën zyrtari iranian tha se do të forconte “sigurinë e brendshme dhe të përbashkët të të dyja vendeve”.

Më herët të mërkurën, Ghalibaf vlerësoi lidhjen “e pathyeshme” mes popujve të Irakut dhe Iranit para nisjes së tij drejt këtij vendi, raportuan mediat shtetërore iraniane.

Ai gjithashtu bëri thirrje për marrëdhënie të thella dhe lidhje të sigurisë mes vendeve islamike të rajonit, “në mënyrë që të zhvillohet bashkëpunimi i qëndrueshëm ekonomik, dhe Republika Islamike e Iranit është e gatshme për këtë”.