Deputeti i Aleancës Shqiptare në Parlamentin e Malit të Zi, Ilir Çapuni, reagoi ndaj deklaratës së ministres serbe e cila tha në një intervistë se në vitin 1998, nëse do të kishte qenë në pozicionin e Presidentit të atëhershëm të RFJ-së, Slobodan Millosheviq, do ta kishte pastruar etnikisht Kosovën.

“Si politikane shqiptare në Mal të Zi, jam thellësisht i shqetësuar nga deklarata e ministres Snezhana Paunoviq se do të kishte kryer pastrim etnik të Kosovës. Edhe më shqetësues është fakti se në vend të një dënimi të qartë, ajo u mbrojt nga zëvendëskryeministri i Serbisë, Ivica Daçiq, i cili u përpoq ta relativizonte një deklaratë të tillë”, tha Çapuni.

Në reagimin e tij, ai thekson se asnjë padrejtësi ndaj asnjë populli nuk mund të jetë justifikim për të thirrur ose justifikuar pastrimin etnik të një populli tjetër.

“Deklarata të tilla konfirmojnë më së miri pse pavarësia e Kosovës ishte një domosdoshmëri historike, por edhe pse ato me të drejtë shkaktojnë shqetësim tek të gjitha komunitetet minoritare në Serbi. Evropa nuk ka të ardhme me politikat e viteve 1990. Është koha për ta hedhur poshtë pa mëdyshje një retorikë të tillë, jo për ta justifikuar ose relativizuar atë”, tha deputeti i Aleancës Shqiptare.