LVV në Prishtinë kundërshton rritjen e çmimit të biletës së autobusit, kërkon tërheqjen e vendimit

Lajme

01/07/2026 14:47

Lëvizja Vetëvendosje, dega në Prishtinë, ka reaguar ndaj vendimit për rritjen e çmimit të biletës së transportit urban në kryeqytet, duke e cilësuar atë si pasojë të, sipas saj, dështimeve të qeverisjes së përbashkët të PDK-së dhe LDK-së në Komunën e Prishtinës.

Në një komunikatë të publikuar të martën, LVV vlerëson se pas pesë vitesh qeverisje nuk ka pasur investime të mjaftueshme në transportin publik, duke përmendur mungesën e autobusëve të rinj, përmirësimit të kushteve për udhëtarët dhe rritjes së cilësisë së shërbimeve, transmeton lajmi.net.

Sipas këtij subjekti politik, premtimet e dhëna gjatë fushatës zgjedhore për zgjidhjen e problemeve në transportin publik nuk janë realizuar. Në komunikatë përmendet edhe premtimi për transport publik falas, duke u theksuar se qytetarët tashmë përballen me një biletë më të shtrenjtë.

LVV po ashtu thekson se Komuna e Prishtinës ka ndarë mbi 8 milionë euro për transportin publik në buxhetin e vitit 2026, duke argumentuar se, përkundër këtij financimi, është vendosur rritja e çmimit të biletës.

Sipas komunikatës, vendimi është marrë pa analiza të mjaftueshme dhe pa një vizion të qartë për zhvillimin e transportit publik. Për këtë arsye, Lëvizja VETËVENDOSJE! kërkon nga ekzekutivi i Kryeqytetit që ta tërheqë menjëherë vendimin për shtrenjtimin e biletës.

Partia opozitare vlerëson se Prishtina ka nevojë për më shumë autobusë, shërbime më cilësore dhe një sistem më efikas të transportit publik, duke shtuar se qytetarët presin një qeverisje që i përmbush premtimet e dhëna.

Komunikata e plotë:

Vendimi për rritjen e çmimit të biletës së transportit urban është dëshmi se qeverisja e PDK-së dhe LDK-së në Prishtinë ka zgjedhur t’ua kalojë qytetarëve koston e dështimeve të veta.

Pas pesë vitesh qeverisje, bilanci është i qartë: asnjë autobus i ri për Trafikun Urban, asnjë përmirësim i kushteve për udhëtarët, asnjë rritje e cilësisë së shërbimeve. Në vend të investimeve dhe reformave, qytetarëve u servohet vetëm një biletë më e shtrenjtë.

PDK dhe LDK kërkuan besimin e qytetarëve duke premtuar zgjidhje për trafikun dhe transportin publik. Uran Ismaili, partneri kujdestar i Përparim Ramës, premtonte transport publik falas. Sot, me PDK-në në pushtet, qytetarët nuk marrin transport falas, por një biletë dy herë më të shtrenjtë.

Kjo tregon se për PDK-në dhe LDK-në, premtimet zgjasin vetëm deri në ditën e zgjedhjeve. Pas zgjedhjeve, qytetarët përballen me tarifa më të larta, ndërsa Kryeqyteti vazhdon të ketë të njëjtat probleme: mungesë autobusësh, shërbim të pamjaftueshëm, pritje të gjata dhe mungesë vizioni për zhvillimin e transportit publik.

Komuna e Prishtinës ka buxhetuar mbi 8 milionë euro për transportin publik në vitin 2026. Këto janë para të qytetarëve, të mbledhura nga taksat e tyre. Megjithatë, përveç këtij financimi, qeverisja e Përparim Ramës ka vendosur ta shtrenjtojë edhe biletën. Prishtinasit paguajnë dy herë për të njëjtin shërbim. Një herë me taksat e tyre dhe një herë me biletën e shtrenjtuar.

Ky vendim është marrë pa asnjë analizë të qartë, pa asnjë logjikë ekonomike dhe pa asnjë vizion zhvillimor. Prandaj, ne e kundërshtojmë këtë vendim dhe kërkojmë nga ekzekutivi i Kryeqytetit ta tërheqë menjëherë.

Prishtina nuk ka nevojë për bileta më të shtrenjta. Ka nevojë për më shumë autobusë, transport publik më efikas, shërbime më cilësore dhe një vizion të qartë për mobilitetin urban. Mbi të gjitha, ka nevojë për një qeverisje që i mban premtimet që u jep qytetarëve./lajmi.net/