Që nga bombardimi i parë i SHBA-ve në Iran, menjëherë në Kosovë është reflektuar në rritje të çmimit të naftës.

Nafta dhe derivatet e saj, pësuan rritje ekstreme të çmimit për shkak të mbylljes së Ngushticës së Hormuzit, që është dalja kryesore e naftës nga Irani për në vende të ndryshme të botës.

Çmimi më i lartë i naftës në Kosovë gjatë kësaj periudhe lufte ka arritur edhe në 1.91 euro/litër, e që e detyroi Ministrinë e Industrisë, Ndërmarrësisë dhe Tregtisë të marrë vendim për caktimin e çmimit maksimal të naftës për çdo 24 orë.

Edhe pasi lufta SHBA-Iran mori fund pas nënshkrimit të një marrëveshje mes tyre, dhe Ngushtica e Hormuzit u hap, çmimi i naftës ende nuk ka rënë në atë që ishte para se të fillonte lufta.

Sot, çmimi i naftës është 1,36 euro/litër, dhe në lidhje me këtë, lajmi.net ka dërguar pyetje tek MINTI.

Ata përmes një përgjigje për lajmi.net kanë thënë se çmimet e derivateve të naftës në Republikën e Kosovës janë në trend të rënies dhe po pësojnë ndryshime të vazhdueshme në përputhje me lëvizjet e tregut, në bursat ndërkombëtare.

“Ju rikujtojmë se ministrja e Industrisë, Ndërmarrësisë, Tregtisë dhe Inovacionit,  Mimoza Kusari- Lila, më 5 prill 2026 ka marrë vendim për përcaktimin e çmimeve tavan (maksimale të lejuara) për derivatet e naftës në Republikën e Kosovës. Ky vendim ka mundësuar një nivel më të lartë transparence dhe mbrojtjeje për qytetarët. Që nga hyrja në fuqi e këtij vendimi, MINTI, publikon çdo ditë, në orën 09:00, çmimet maksimale të lejuara përmes kanaleve të saj zyrtare, si informacion për qytetarët dhe operatorët ekonomikë. Ju informojmë se çmimet maksimale të lejuara llogariten dhe publikohen çdo 24 orë”, kanë thënë nga MINTI. 

Ata kanë treguar edhe se si bëhet përllogaritja e çmimit.

“Përllogaritja bëhet në përputhje me Udhëzimin Administrativ për Rregullimin e Çmimeve të Produkteve të Naftës dhe Karburanteve të Ripërtëritshme, si dhe me masat e tjera mbrojtëse të përcaktuara nga legjislacioni në fuqi. Për rrjedhojë, lëvizjet e çmimeve në tregjet ndërkombëtare nuk reflektohen domosdoshmërisht menjëherë në tregun vendor, pasi çmimi maksimal përcaktohet mbi bazën e kostove reale të furnizimit dhe të dhënave të importit të raportuara nga Dogana e Kosovës”, kanë thënë nga MINTI.

Vendimi për përcaktimin e çmimeve maksimale për derivatet e naftës, MINTI ka thënë se është në fuqi ende.

“Sa i përket kohëzgjatjes së masës së kontrollit të çmimeve, ajo do të vazhdojë të zbatohet për aq kohë sa mbetet në fuqi baza ligjore përkatëse dhe vlerësohet e nevojshme për mbrojtjen e konsumatorëve, ruajtjen e konkurrencës së ndershme dhe funksionimin e qëndrueshëm të tregut”, kanë thënë nga MINTI për lajmi.net. 

Sot, çmimi i naftës ka rënë në nivele të papara që nga lufta e Iranit, ndërsa trafiku përmes rrugës kryesore të transportit detar të Ngushticës së Hormuzit rifillon gradualisht.

Nafta e papërpunuar Brent ra përkohësisht nën 72.48 dollarë (55 £) për fuçi, çmimi që ishte një ditë para se SHBA-të dhe Izraeli të nisnin sulmet ndaj Iranit më 28 shkurt, përpara se të arrinte në 72.63 dollarë, shkruan BBC.

Kostoja e naftës së papërpunuar ka rënë ndjeshëm që kur SHBA-të dhe Irani nënshkruan një Memorandum Mirëkuptimi (MOU) më 17 qershor, i cili përcaktoi një periudhë 60-ditore për negociata mbi programin bërthamor të Teheranit dhe masa të tjera për t’i dhënë fund luftës.