Vjosa Osmani në adresimin përmbyllës të mandatit të saj pesëvjeçar në krye të shtetit tha se ndihet krenare që institucionin që e drejtoi po e lë si më të respektuarin në botë.

Gjatë këtij adresimi, ajo theksoi gjithashtu se atë po e lë me dyer të hapura.

“Jam thellësisht krenare që këtë institucion po e lëmë më të respektuar në botë, me dyer të hapura dhe me aleanca të forcuara”.

Ajo veçoi si arritje kyçe sigurimin e njohjeve të reja ndërkombëtare dhe liberalizimin e vizave me Bashkimi Evropian, duke e cilësuar këtë si një hap të rëndësishëm për qytetarët e vendit.

“Duke i sjellë Kosovës njohje të reja; duke arritur liberalizimin e vizave me BE-në e me shumë shtete të tjera; duke bërë hapa konkretë drejt integrimit të vendit në BE dhe në Këshillin e Evropës; e po ashtu hapa konkret drejt të ardhmes në NATO, duke siguruar garanca të fuqishme për paprekshmërinë e kufijve tanë; duke ndërtuar partneritete për fuqizimin e ushtrisë sonë; duke e bërë Kosovën pjesë të platformave ku nuk ka pasur qasje më herët, si me pjesëmarrjen historike në Samitin e NATO-s, duke e bërë anëtare themeluese në Bordin e Paqes; duke e kthyer Kosovën në qendër të agjendave globale: nga Agjenda për Gratë, Paqen dhe Sigurinë. deri te mbrojtja e fëmijëve në botën digjitale”

“ Duke i përparuar ndjeshëm raportet me vendet e tjera, deri dje hezituese për të krijuar raporte me vendin tonë; duke hapur perspektiva të reja marrëdhëniesh politike me shumë vende të tjera gjithandej rruzullit tokësor, në këto 5 vjet kemi dëshmuar se edhe një shtet i vogël mund të ketë zë të madh”.

“Sepse ky ishte vizioni ynë që në ditën e parë kur u betova në Kuvend por mbi të gjitha kur u betova para jush: që Kosova të mos jetë vetëm pjesë e tavolinave ndërkombëtare, por edhe kontribuuese aktive në to”.