Kompania Kosovare për Furnizim me Energji Elektrike (KESCO) ka bërë apel për të gjithë konsumatorët që të kursejnë energjinë elektrike dhe të bashkëpunojnë në këtë periudhë kur konsumi është shumë i lartë dhe sistemi është nën ngarkesë.

KESCO thekson se stabiliteti i furnizimit është i rëndësishëm jo vetëm për jetën e përditshme, por edhe për procese të rëndësishme në vend, përfshirë organizimin e zgjedhjeve nacionale, transmeton lajmi.net.

Kompania po operon me kapacitete të shtuara, sidomos në Qendrën e Thirrjeve, për t’iu përgjigjur kërkesave të konsumatorëve. Megjithatë, në rastet e ndërprerjeve më të mëdha, thirrjet janë të shumta dhe kërkohet mirëkuptim për kohën e pritjes.

KESCO sugjeron disa veprime që mund të bëjnë të gjithë për të ndihmuar stabilizimin e furnizimit:

• Kursimi i energjisë elektrike;

• Shmangia e përdorimit të pajisjeve me konsum të lartë njëkohësisht;

• Përdorimi i ngrohjes elektrike me moderim, duke ngrohur vetëm hapësirat ku qëndrohet;

• Mbajtja e temperaturës rreth 20–21°C.

Kompania apelon që veprimet e vogla nga secili prej konsumatorëve mund të kenë ndikim të madh në ruajtjen e stabilitetit të energjisë për të gjithë./lajmi.net/