Rezervat shtetërore: Prokuroria i ngrit aktakuzë Ridvan Muharremit, dostit të Albin Kurtit – kryeministri e frekuentonte restorantin e tij

Lajme

11/11/2025 20:00

Prokuroria Speciale sot i ka ngritur aktakuzë katër personave në lidhje me skandalin e rezervave shtetërore.

Përveç ministres, Rozeta Hajdari, Prokuroria i ka ngritur aktakuzë edhe Irfan Lipovicës, Hafiz Garës dhe Ridvan Muharremit, transmeton lajmi.net.

Ky i fundit njihet si “dosti i Kurtit”, pasi kryeministri e frekuentonte shpesh restaurantin e tij në Prishtinë “Bukë e Zemër”.

Hajdari, Lipovica, Gara dhe Muharremi akuzohen se e kanë dëmtuar buxhetin e shtetit për afro 3 milionë euro.

Siç është raportuar në vazhdimësi për këtë rast, Muharremi besohet të ketë qenë ndërmjetësuesi mes shtetit të Kosovës dhe një kompanie polake për blerjen e rezervave shtetërore.

Kompania e Polonisë “Xanto” me të cilën Ministria e Tregtisë kishte lidhur marrëveshje për vajin e sheqerit, disa herë ishte arsyetuar që nuk po mund ta dërgojë mallin në Kosovë.

Një pjesë e mallit nuk kishte arritur kurrë.

Njoftimi i plotë nga Prokuroria Speciale:

AKTAKUZË PËR VEPRËN PENALE “KEQPËRDORIMI I POZITËS APO AUTORITETIT ZYRTAR”

Prishtinë, 11 Nëntor 2025 – Prokuroria Speciale e Kosovës ka dorëzuar aktakuzë në Gjykatën Themelore në Prishtinë, ndaj R.H., I.L. dhe H.G nën dyshimin për kryerjen e veprave penale “Keqpërdorimi i pozitës apo autoritetit zyrtar” dhe “Zbulimi i fshehtësisë zyrtare”, ndërsa ndaj R.M., nën dyshimin për kryerjen e veprës penale “Ndihma në kryerjen e veprës penale të keqpërdorimit të pozitës apo autoritetit zyrtar”.

Të pandehurit R.H., I.L. dhe H.G., akuzohen se gjatë muajve shkurt – mars të vitit 2022, Në bashkëkryerje, kanë keqpërdorur detyrat zyrtare me qëllim përfitimi pasuror për persona të tjerë dhe shkaktimi të dëmit ndaj buxhetit të Republikës së Kosovës.

Si rezultat i veprimeve të të pandehurëve, i është shkaktuar buxhetit të shtetit dëm prej 2,912,134.78 euro.

Të pandehurit R.H., I.L dhe H.G. akuzohen gjithashtu se, pa autorizim, kanë zbuluar fshehtësinë zyrtare. Edhe pse kanë qenë në dijeni se vendndodhja e rezervave shtetërore përbën sekret shtetëror, sipas Ligjit për Rezervat Shtetërore të Mallrave, ata me dashje ia kanë vënë në dispozicion këtë informacion të pandehurit R.M.

Ndërkaq, i pandehuri R.M. akuzohet se u ka krijuar kushte të tjerëve për kryerjen e veprës penale, duke ndërmjetësuar dhe negociuar drejtpërdrejt, si dhe duke propozuar e rekomanduar përzgjedhjen e operatorëve ekonomikë në emër të rezervave shtetërore./lajmi.net/