Zhvilluesi i pasurive të paluajtshme, që tani është kthyer në një “thikë zvicerane” diplomatike (zyrtarisht i dërguari special presidencial për misionet e paqes), të hënën po qëndronte në galeritë e Kneset-it izraelit duke dëgjuar Presidentin Donald Trump, i cili po shijonte marrëveshjen e re për armëpushim në këmbim të pengjeve, kur shefi i tij i kujtoi një tjetër detyrë.

“Duhet ta mbyllim Rusinë. Duhet ta mbarojmë atë punë,” tha Trump ndërsa fliste për një marrëveshje të re bërthamore me Iranin. “Nëse nuk të shqetëson, Steve, le të përqendrohemi fillimisht tek Rusia.”

I frymëzuar nga suksesi në Lindjen e Mesme, Trump po përpiqet të shfrytëzojë atë përbërësin më të rrallë në politikë dhe diplomaci: momentumin. Një javë që filloi me një udhëtim 36-orësh në Lindjen e Mesme përfundoi me presidentin e Ukrainës në Shtëpinë e Bardhë, duke u përpjekur ta bindte Trump-in të miratonte raketa të reja me rreze të gjatë, përpara një takimi të papritur me Vladimir Putinin në Budapest.

Në ndërkohë, Trump konfirmoi se kishte autorizuar CIA-n të vepronte fshehurazi në Venezuelë, ndërsa kërcënoi me sulme brenda vendit. Ai i dha mbështetje — dhe një shpëtim financiar prej 20 miliardë dollarësh nga Thesari Amerikan — liderit të Argjentinës me prirje të ngjashme politike. Po ashtu, ai lëshoi paralajmërime të reja për tarifa ndaj Kinës përpara një takimi të rëndësishëm me Presidentin Xi Jinping pas disa javësh, shkruan CNN.

“Mendoj se kemi shumë momentum, shumë besueshmëri. Marrëveshja në Lindjen e Mesme ishte shumë e rëndësishme”, tha Trump të premten gjatë një dreke me homologun ukrainas në Sallën e Kabinetit.

“Askush nuk besonte se mund të arrihej. Ishte një nga ato që askush nuk mendonte se do të realizohej, por ne e arritëm”.