Aktori dhe profesori i njohur, Enver Petrovci është përcjellur me duartrokitje e vlerësime të larta për jetën dhe veprën e tij nga amfiteatri i Teatrit Kombëtar të Kosovës drejtë varrezave të qytetit.

Në mbledhjen komemorative për Petrovcin, të pranishëm ishin familjarë, qytetarë, figura publike e artistë të vendit, ku edhe falënderuan Petrovcin për shfaqjet që ai ka dhuruar.

Me lot në sy, vajza e tij, Vanesa Petrovci falënderoi babain e saj për mësimet e këshillat që ia ka dhënë asaj për jetën.

Petrovci tregoi edhe momentet e fundit të aktorit.

“Këtë fjalim e pata shumë të vështirë me e shkruar se për babin nuk kanë fund fjalët e mira që kam për të. Kur jam në skenë jam mësuar gjithmonë me qenë në publikë dhe kam kërkuar sytë e tij për me më përkrah. Sot jam prapë në skenë por nuk po e gjej në mesin e publikut.. I ka dashur njerëzit pa kushte dhe i ka besuar e nuk ka besuar në të keqën e askujt, një njeri me zemër të mirë e të pastër… Tash e disa vjet me këtë sëmundje tepër të rëndë, ai ka kalua njësoj me humor edhe kur kishte dhimbje të hatashme, me humor edhe ndërroi jetë. Në momentet e fundit ka kënduar, ka folur dhe buzëqeshur dhe na ka lehtësuar edhe neve dhimbjen”, tha Petrovci.

I pranishëm ishte edhe ministri në detyrë i kulturës, Hajrulla Çeku.

Çeku u shpreh se mësimet që dha ai, do të mbesin ndër breza.

“Petrovci mjeshtër i madh i skenës në teatër, film, njeriu i dashur i publikut na la një zbrazëti të madhe, ashtu siç na la edhe shumë mësime të çmuara. Kjo zbrazëti nuk mbushet dot, por mësimet duhet të jetojnë. Një njeri i dashur dhe serioz, brutal në sinqeritet dhe i drejtpërdrejtë, kjo është figura e Enverit që sot, e përcjellim me pikëllim të madh. Ju shpreh ngushëllime të gjithë familjarëve, miqve, kolegëve, nxënësve e publikut të tij, ata që kanë parë një herë në skenë nuk kanë mundësi ta harrojnë”, tha Çeku.

E drejtori i Teatrit Kombëtar të Kosovës, Kushtrim Sheremeti edhe si një ish student i tij, e falënderoi që ia ka mësuar zanatin, e për shfaqjen e parë që është mbajtur në teatër pas luftës ku edhe u ringjall teatri i vendit.

Sheremeti kërkoi nga të gjithë të pranishmit që nga amfiteatri, Petrovci të përcillet në shtëpinë e tij të fundit me duartrokitje.

“Profesor dua të ju falënderoj së pari si student, që na ke mësuar zanatin. Si drejtor i Teatrit, dua të falënderoj për të gjithë ato punë e role, e sidomos për shfaqjen e parë të teatrit pas lufte ku edhe ky institucion e ka rinisur punën e vet.. Do të na mungosh, kujtimi për ty do të jetë i përhershëm”, shtoi Sheremeti.

Në moshën 71 vjeçare, aktori i njohur, Enver Petrovci ka ndërruar jetë nga një sëmundje e rëndë. Petrovci është një nga themeluesit e Teatrit Dodona dhe Shkollës së Aktrimit në Prishtinë.

Në këtë rol, ai ndihmoi në formimin e brezave të rinj të aktorëve që sot përbëjnë shtyllat e teatrit dhe kinemasë në Kosovë.