Ish-gjyqtari i Gjykatës Kushtetuese, Kadri Kryeziu, ka reaguar ndaj propozimeve për përsëritjen e votimit të nënkryetarëve të Kuvendit të Kosovës, duke e quajtur të padrejtë idenë që edhe zgjedhja e Emilija Rexhepit të anulohet.

Reagimi i tij vjen pas qëndrimeve të shprehura nga OJQ-ja IKD dhe përfaqësues të partive politike si LDK dhe, në një masë më të heshtur, edhe PDK, transmeton lajmi.net.

“Është padrejtësi nëse anulohet zgjedhja e Emilija Rexhepit,” ka deklaruar Kryeziu, duke theksuar se komunitetet jo-serbe kanë status të veçantë dhe të ndarë nga komuniteti serb në Kushtetutë.

“Nuk e kuptoj këtë nguti dhe zhurmë që komunitetet tjera të futen në një thes me komunitetin serb. Ato kanë identitete të veçanta, por edhe qëndrime, synime dhe objektiva të ndryshme,” shtoi ai.

Sipas Kryeziut, vetë propozimi për nënkryetare të Kuvendit nga ana e ministrit Elbert Krasniqi, në emër të tetë deputetëve të komuniteteve jo-serbe, kishte kërkuar që procesi i votimit të jetë i ndarë nga ai për përfaqësuesin serb.

“Komuniteti serb dhe komunitetet tjera jo-shumicë nuk janë një kategori e përbashkët në Kushtetutë. Secili ka vendin dhe përfaqësimin e vet të garantuar,” tha ai.

Duke e cilësuar zgjedhjen e Emilija Rexhepit si të ligjshme dhe legjitime, Kryeziu shton se çdo përpjekje për ta delegjitimuar atë përmes përsëritjes së votimit, është një akt që cenon dinjitetin e përfaqësuesve të komuniteteve joserbe.

“Me çfarë të drejte ne do i themi asaj: na vjen keq, por ai votim nuk vlen sepse ti nuk mund të zgjidhesh pa u çiftëzuar në votim me kandidatin serb? Thjesht është padrejtësi dhe nënçmim i madh,” përfundon ai.

Postimi i plotë: