Kryeministri në detyrë, Albin Kurti gjatë ditës së sotme vizitoi Fushë-Kosovën ku bashkë me ministren në detyrë Arbërie Nagavci morën pjesë në përurimin e një çerdhe dhe një shkolle.

Pas kësaj, Kurti gjeti pak kohë edhe për t’u deklaruar në lidhje me çerdhen, por edhe për pyetjet që gazetarët veçse po prisnin t’ia parashtronin.

Derisa Kurti po deklarohej, gazetari i lajmi.net e pyet se “cila është arsyeja që nuk e keni uruar Dimal Bashën për postin e Kryetarit të Kuvendit të Kosovës”.

E me këtë rast derisa po fliste për Dimal Bashën duke e mbrojtur në lidhje me artikullin kundër UÇK-së, Kurti harron se ku mbeti me fjali.

“Ku mbeta tash”, thotë Kurti teksa po përgjigjej për pyetjen paraprake.

“Kryetari i Kuvendit, Dimal Basha e ka dhënë sqarimin për atë publikim që është bërë para më shumë se një dekade dhe aty e ka sqaruar se kapitulli apo kreu që e ka shkruar ai nuk ka asgjë të bëjë me Ushtrinë Çlirimtare të Kosovës….nuk ka të bëjë asgjë me UÇK edhe njëherë ju e keni parë fjalimin e tij pas zgjedhjes ka shprehur vlerësimet më të larta për këtë vlerë të shenjtë të kombit shqiptar. Unë besoj që problemet që i kemi sot në Kosovë nuk i kemi nga një deformim apo keqinterpretim i një artikulli me bashkëautorësi ku ky nuk është autor i atij kapitulli. Problemet i kemi kur është nënshkruar Zajednica në 2013, problemet i kemi kur janë amnestuar kriminelët në veri poashtu në 2013, problemet i kemi kur është votuar Gjykata Speciale në 2015, problemet i kemi kur është themeluar Lista Serbe në bashkëpunim me Beogradin në vitin 2013, problemet i kemi kur politikanët e Kosovës kanë bërë qeveri duke u varur nga Lista Serbe e jo tek ky artikull ku manipulohet një kre tek i cili nuk ka fare autorësi”, tha Kurti./Lajmi.net/