Nga ora 14:00 do të vazhdojë seanca e sotme konstituive në ditën e fundit të afatit 30-ditor që e caktoi Gjykata Kushtetuese për deputetët që të konstituojnë Kuvendin e ri.

Kryesuesi i seancës, Avni Dehari, pas dështimit të djeshëm meqë propozimi për Komision për votim të fshehtë s’i gjet mbështetje prapë, tha se meqë është dita e fundit kur deputetët mund të mblidhen, seanca do të vazhdojë në më pak se 48 orë siç ndodhi për muaj me radhë.

“Dje jemi njoftuar për vendimin e Gjykatës Kushtetuese për masën e përkohshme. Pra, sipas vendimit të Gjykatës Kushtetuese masa e përkohshme hyn në fuqi më 27 korrik në kohëzgjatje deri më 8 gusht. Duke pasë parasysh që kjo masë hyn në fuqi ditën e diel dhe po ashtu afati prej 30 ditësh për konstituimin e Kuvendit i vendosur nga Gjykata Kushtetuese përfundon nesër, atëherë si kryesues i seancës konstituive dhe si përpjekje për konstituimin e Kuvendit, seancën e radhës do ta mbajmë nesër. Për sot ndërpritet seanca, nesër takohemi në orën 14:00”, tha Dehari dje.

Gjykata Kushtetuese caktoi 30 ditë për deputetët që të kryejnë obligimin e tyre kushtetues dhe të konstituojnë legjislaturën e nëntë të dalë nga zgjedhjet e 9 shkurtit.

Por, deputetët për 29 ditë injoruan këtë obligim, ndërsa pardje nxori një masë të përkohshme prej dy javësh që pezullon punën e Kuvendit deri në nxjerrjen e një aktgjykimi final që do të qartësojë rrugën përpara për të dalë nga një situatë e paprecedentë ku ka hyrë Kuvendi i Kosovës.

Nga partia e parë, Lëvizja Vetëvendosje, nuk ka shenja se do të heqë dorë nga këmbëngulja në propozimin e saj për Albulena Haxhiun kryeparlamentare, e cila edhe për afër pesë muaj s’arriti ta merrte mbështetjen e nevojshme të deputetëve.

Këtë post tashmë po e kërkon edhe Fatmir Limaj, i cili u pa si bashkëpunëtori i vetëm për Vetëvendosjen me votat e të cilit formimi i institucione të reja është më real.