Ministri në dorëheqje i Financave, Hekuran Murati, ka reaguar përsëri në mënyrë të ashpër ndaj vendimit të Gjykatës Supreme që shpalli të jashtëligjshëm udhëzimin administrativ për pajisjet fiskale. Përmes një postimi në Facebook, ai e ka quajtur vendimin “absurd” dhe ka akuzuar gjyqtarët për “keqinterpretim të Kushtetutës”.

Murati ka deklaruar:“Ky interpretim i tre gjykatësve të Supremes është në kundërshtim flagrant me atë që ka thënë vetë Gjykata Kushtetuese.”

Ai gjithashtu ka komentuar: “Në vend se të lexonin statuset në Facebook të deputetëve të opozitës, do të mjaftonte që tre gjykatësit e Supremes të lexonin Aktgjykimin e Gjykatës Kushtetuese… për të mos bërë vendime absurde.”

Kritikët tërheqin vëmendjen se hezitimi i Muratit për të pranuar shkeljet ligjore dhe për t’u bindur prapa vendimeve të institucioneve pasqyron një qëndrim që minon autoritetin e Gjykatës Supreme, transmeton lajmi.net

Për më tepër, ai vazhdon të përdorë platformën e tij për të delegjitimuar organin më të lartë gjyqësor të vendit.

Postimi i plotë: 

Sipas Aktgjykimit KO124/25 të Gjykatës Kushtetuese, <deputeti llogaritet që fillon të ushtrojë funksionin tek pasi të ketë përfunduar konstituimi i Kuvendit>. (Shih paragrafin 138 të Aktgjykimit, foto më poshtë)

Kurse paradoksalisht, në vendimin e fundit kundër digjitalizimit të arkave fiskale, tre gjykatësit e Gjykatës Supreme janë lëshuar në interpretime të Kushtetutës, duke thënë se funksioni i deputetit ushtrohet që nga <dita kur çertifikohen rezultatet e zgjedhjeve>, dhe kësisoj kanë argumentuar që ka pasur konflikt funksional (megjithëse ata gabimisht e përdorin shprehjen “konflikt interesi” ngjashëm si disa deputetë të opozitës).