Deputetja PDK-së, Blerta Deliu-Kodra, ka reagua ndaj situatës aktuale në Kuvendin e Kosovës, duke thënë se moskonstituimi i tij po shkakton pasoja serioze për funksionimin e shtetit dhe institucioneve të pavarura.

Përmes një postimi në Facebook, Deliu theksoi se bllokada jo vetëm që ka lënë disa komuna pa buxhet, por gjithashtu ka ndalur procesin e emërimeve nëpër institucione kyçe.

Ajo theksoi se për pasojë, Gjykata Kushtetuese është pa gjyqtarë, Komisioni i Pavarur për Media është jofunksional, ndërsa Avokati i Popullit vazhdon të jetë pa zëvendës. Sipas saj, shumë borde, agjenci dhe komisione vendimmarrëse kanë qindra pozita të zbrazëta.

“Pengmarrja e institucionit më të lartë në vend, rrezikon thellësisht demokracinë!”, ka shkruar Deliu.

Postimi i plotë:

Moskonstituimi i Kuvendit, përveq faktit se ka lënë pa buxhet disa komuna, ka bllokuar tërësisht procesin e emërimeve në institucione të pavarura. Mungesa e veprimit nga legjislatura e kaluar dhe vonesat e Qeverisë në largim kanë lënë:

Gjykatën Kushtetuese pa gjyqtarë,

Komisionin e Pavarur për Media jofunksional,

Avokatin e Popullit pa zëvendës,

Qindra pozita bosh në borde, agjenci dhe komisione vendimmarrëse.

Pasojat janë të rënda: jofunksionalitet institucional, mungesë llogaridhënieje dhe shkelje e sundimit të ligjit.

Pengmarrja e institucionit më të lartë në vend, rrezikon thellësisht demokracinë./Lajmi.net/