Kandidati i Partisë Demokratike të Kosovës (PDK) për kryetar të Komunës së Lipjanit, Shukri Buja, ka zhvilluar një takim me të rinjtë e kësaj komune, të cilët i ka cilësuar si forca lëvizëse e ndryshimit.

Në këtë takim, i cili u zhvillua pas zyrtarizimit të kandidaturës së tij, mori pjesë edhe kryetari i PDK-së, Memli Krasniqi. Buja tha se me të rinjtë lipjanas diskutuan për sfidat dhe pritshmëritë që ata kanë për të ardhmen e komunës, si dhe për idetë e tyre për zhvillim.

“Pas zyrtarizimit si kandidat për Kryetar të Komunës së Lipjanit, së bashku me Kryetarin e Partisë Demokratike të Kosovës z. Memli Krasniqi, zhvilluam një takim të frytshëm me të rinjtë lipjanas të cilët janë forca lëvizëse e ndryshimit,” ka shkruar Buja, transmeton lajmi.net

Ai theksoi se rinia nuk është vetëm spektatore në këtë proces, por pjesë aktive e vizionit të tij për një komunë më të drejtë dhe më të zhvilluar.

“Rinia nuk është spektatore por pjesë aktive e vizionit tonë për Lipjanin,” tha ai.

Buja shtoi se me PDK-në, përfshirja e të rinjve nuk është vetëm simbolike, por thelbësore për ndryshimin që, siç u shpreh ai, “po vjen”.

“Me Partinë Demokratike të Kosovës, angazhimi i të rinjve nuk është simbolik por thelbësor për ndryshimin që po vjen,” përfundoi kandidati për kryetar të Lipjanit./lajmi.net/