Nënkryetari i Lidhjes Demokratike të Kosovës, Lutfi Haziri, ka deklaruar se mungesa e vullnetit politik dhe mosarritja e një marrëveshje për formimin e Qeverisë është arsyeja që po e mban peng zgjedhjen e kryetarit të Kuvendit.

Haziri ka theksuar se që në seancën e parë ishte e qartë se Kosova ndodhej në një ngërç politik.

“Ka mungesë të vullnetit politik. Mungesa e një marrëveshje për qeveri po e mban peng moszgjedhjen e kryetarit të Kuvendit. Nuk ka arsye tjetër këtu”, ka deklaruar Haziri për Duakgjinin.

Ai ka shtuar se mungesa e marrëveshjes për Qeverinë po krijon një situatë ku procesi i Kuvendit po shikohet si një mënyrë për të fituar kohë, në vend që të vazhdohet me procedurat e tjera.

“Interesi politik shumë më i madh është te qeveria. Mungesa e një marrëveshje për qeverinë i jep të drejtë dikujt të menaxhojë procesin e Kuvendit si blerje kohe”, ka theksuar ai.