Shpërthimi në veturën e drejtorit të QKUK-së, Vitia: Kushdo që ka provuar të vendosë në sprovë shtetin dhe institucionet e vendit do të dështojë

Lajme

30/04/2025 18:31

Ministri i Shëndetësisë në dorëheqje, Arben Vitia ka reaguar pasi sot ka pasur një shpërthim në veturën e ushtruesit të detyrës së drejtorit të QKUK-së, Osman Hajdarit.

Vitia përmes një postimi në Facebook, ka shkruar se kushdo që ka provuar të vendosë në sprovë shtetin dhe institucionet e vendit do të dështojë, shkruan lajmi.net.

“Sulmi ndaj U.d. Drejtorit të QKUK-së do të marrë përgjigjen që meriton. Nuk ka kthim pas sepse asnjë prej nesh nuk do ta lejojë këtë në asnjë rrethanë”, ka shkruar Vitia.

Në lidhje me sulmin sot ka reaguar edhe vetë Hajdari, i cili ka thënë se sulmi mund të ndërlidhet me punën e tij në QKUK.

“…Pas nja 1 ore e diçka më njoftuan se ka një shpërthim në parkingun e QKUK-së dhe dolëm e vizituam… ishte një mjet si të thuash shpërthyes në makinën time…

Konsideroj që puna e përditshme për një vit e sa në krye të QKUK meqenëse në jetën time private nuk kam asnjë problem, as në të kaluarën, as tash dhe konsideroj se ky akt krejt është i lidhur me detyrën time zyrtare, me punët e mia dhe vendosmërinë për me vendos rregull dhe rend në Qendrën Klinike Universitare dhe ndoshta kjo punë u pengon grupeve të ndryshme të interesit…”, tha ai.

Rastin e kanë konfirmuar edhe nga Policia e Kosovës, të cilët kanë thënë se po hetohet rasti.

“Rreth orës 10:00, është pranuar informata lidhur me dyshimet për një shpërthim në një veturë në parkingun e QKUK-së. Aktualisht nuk raportohet për të lënduar përveç dëmeve materiale. Policia me të gjitha njësitë relevante ka dalë në vendin e ngjarjes dhe po trajton rrethanat që karakterizojnë ngjarjen”, ka thënë zëdhënësja e Policisë së Kosovës në rajonin e Prishtinës, Flora Ahmeti.

Nga Prokuroria Themelore në Prishtinë, kanë thënë për lajmi.net se është iniciuar rasti për veprën penale ”Shkaktim i rrezikut të përgjithshëm” si dhe ”Përdorim i armës apo mjetit të rrezikshëm”.

“Prokurori i shtetit dhe Njësitet përkatëse janë duke ndërmarrë të gjitha masat dhe veprimet e nevojshme hetimore mbi këtë çështje”, ka thënë Prokuroria Themelore në Prishtinë. /Lajmi.net/