Asociacioni i Gazetarëve të Kosovës e ka mirëpritur pozitën e re që mori gazetari kosovar Nebi Qena, me rol udhëheqës në Associated Press në Shtetet e Bashkuara të Amerikës.

Në një postim në Facebook, AGK bën të ditur se Qena është emëruar zëvendësdrejtor për Video në ShBA në gjigantin mediatik, agjencinë botërore të lajmeve, Associated Press.

Sipas AGK-së, në një letër për stafin, drejtori i lajmeve për ShBA-së, Josh Hoffner ka lavdëruar punën e Qenës.

“Ai ka shkëlqyer në çdo rol që ka mbajtur — shumë prej tyre në kushte jashtëzakonisht sfiduese: ka qenë producent i lartë për Izraelin, Gazën dhe Bregun Perëndimor; menaxher i fundjavës për SHBA-në; korrespondent dhe producent në Kosovë; si dhe ka pasur disa angazhime në Ukrainë gjatë konfliktit të vitit 2014 dhe së fundmi gjatë luftës atje. Kohët e fundit, ai ka shërbyer si zëvendës i përkohshëm në SHBA, duke udhëhequr mbulimin e disa prej ngjarjeve më të rëndësishme, si zjarret në Los Angeles dhe sulmet terroriste në Neë Orleans. Ai pati një ndikim të menjëhershëm dhe të qëndrueshëm, dhe jemi të entuziazmuar që do të marrë përsipër këtë sfidë të re,” ka shkruar Hoffner

Qena e ka nisur karrierën e tij si gazetar i ri në “Koha Ditore”, për të cilën ka raportuar gjatë kohës së luftës në Kosovë.

Pas luftës, ka punuar për disa vite në Radio Televizionin e Kosovës, para se t’i bashkohet Associated Press, ku ka shërbyer në disa role udhëheqëse duke përfshirë në Evropë, Jerusalem, dhe tani është i vendosur në Washington të SHBA-së.