Kryeministri në detyrë i Kosovës, ka takuar sot ministrin e Zhvillimit Rajonal Fikrim Damka, njëherësh Kryetar i Partisë Demokratike Turke të Kosovës (KDTP). 

Në lidhje me këtë takim, ka njoftuar Zyra e Kryeministrit.

Në këtë takim, Damka ia ka konfirmuar Kurtit votën e tij për bashkëpunim të mëtutjeshëm, shkruan lajmi.net.

“Bashkë diskutuan për hapat përpara për formimin e institucioneve të legjislaturës së 9-të të dalë nga zgjedhjet e rregullta parlamentare të 9 shkurtit. Kryeministri Kurti falënderoi z. Damka për punën si ministër i kabinetit në këtë mandat të plotë të qeverisë dhe për bashkëpunimin e afërt si në qeveri ashtu edhe në kuvend. Të dyja palët shprehën vullnetin dhe gatishmërinë që ky bashkëpunim i frytshëm të vazhdojë edhe në legjislaturën në vijim”, thuhet në komunikatën e ZKM-së.

Nëpërmjet kësaj komunikate, ZKM ka njoftuar se Kurti do të zhvillojë takime edhe me drejtues dhe përfaqësues tjerë të partive të komuniteteve joshumicë që kanë fituar mandat të përfaqësimit në kuvend. /Lajmi.net/