Presidentja nuk ishte në inaugurimin e Trump-it, por çoi “kallaballëk” të këshilltareve të saj
Presidentja e Kosovës, Vjosa Osmani nuk ka marrë pjesë në inaugurimin e Presidentit të 47-të të SHBA-ve, Donald Trump e përveç saj aty nuk ishte edhe kryeministri Kurti. Ndonëse Osmani nuk shkoi, nga Presidenca e Kosovës shkuan një numër i madh i këshilltareve të saj, shkruan lajmi.net. “Një delegacion presidencial, i përbërë nga Learta Hollaj,…
Lajme
Presidentja e Kosovës, Vjosa Osmani nuk ka marrë pjesë në inaugurimin e Presidentit të 47-të të SHBA-ve, Donald Trump e përveç saj aty nuk ishte edhe kryeministri Kurti.
Ndonëse Osmani nuk shkoi, nga Presidenca e Kosovës shkuan një numër i madh i këshilltareve të saj, shkruan lajmi.net.
“Një delegacion presidencial, i përbërë nga Learta Hollaj, Shefe e Stafit të Presidentes, dhe Rejhan Vuniqi, Këshilltare për Politikë të Jashtme, të shoqëruar nga Ambasadori i Republikës së Kosovës në SHBA, Ilir Dugolli, ka marrë pjesë në aktivitetet e organizuara për nder të inaugurimit të Presidentit të 47-të, të Shteteve të Bashkuara të Amerikës, Donald Trump.
Gjatë këtyre ditëve, ata kanë marrë pjesë në: Ceremoninë e betimit të Presidentit Trump në Capitol Hill, Tubimin e mbajtur para ceremonisë së betimit në Capital One Arena, Ballon e Komandantit Suprem; Ballon Presidenciale “The Liberty Ball”, Ballon “Black Tie and Boots”, të organizuar nga Texas State Society, Midwest Galla, pritjen e organzuar nga Dr. Miriam Adelson, Tilman Fertitta, Sylvie Legere & Todd Ricketts e Mark Zuckerberg, si dhe në Shërbesën e Lutjeve Kombëtare në Washington National Cathedral”, thuhet në njoftimin e Presidencës.
Presidenca e Kosovës ka njoftuar se ata kanë pasur mundësinë të takohen me një sërë zyrtarësh të lartë, senatorë dhe kongresistë, si dhe këshilltarë dhe persona me ndikim nga bota e biznesit dhe sfera të tjera të interesit.
“Gjatë këtyre aktiviteteve, ata kanë pasur mundësinë të bisedojnë me: Kryetarin e Dhomës së Përfaqësuesve në Kongresin amerikan, Mike Johnson; të nominuarin e Presidentit Trump për Drejtor të CIA-s, John Ratcliffe; Kongresistin dhe Kryesuesin e nënkomitetit për Evropë në Komitetin për Politika të Jashtme të Dhomës së Përfaqësuesve të SHBA-ve, Keith Self; Kongresistin Chip Roy; Kongresistin Ronny Jackson; Kongresistin John Cornyn, Kongresistin Ted Cruz; Guvernatorin e Teksasit, Greg Abbott; Guvernatoren e Iowa, Kim Reynolds; Ambasodorin e nominuar të Presidentit Trump në NATO, Matt Whitaker; Zëvendës Guvernatorin e Teksasit, Dan Patrick; Prokurorin e Përgjithshëm të Teksasit, Ken Paxton; ish-Sekretarin e Përgjithshëm të NATO-s, Jens Stoltenberg; Senatoren e Teksasit, Angela Paxton; Këshilltarin lokal, Gino Mulliqi; dhe ish-Kongresistin Jack Fields, si dhe përfaqësues të shumtë të mërgatës”, thuhet mes tjerash.
Sipas njoftimit të Presidencës, në këto takime janë përcjellë urimet më të mira për Presidentin Trump dhe administratën e re në emër të Presidentes Osmani dhe qytetarëve të Kosovës, duke konfirmuar angazhimin e Republikës së Kosovës për avancimin e mëtejshëm dhe të vazhdueshëm të raporteve bilaterale.
“Në bisedat me zyrtarët amerikanë është theksuar gjithashtu rëndësia e vizitave të ndërsjella, si dhe rëndësia e bashkëpunimit me qëllim të avancimit dhe ruajtjes së sigurisë në rajon dhe përtej”, ka shkruar Presidenca. /Lajmi.net/
Postimi i plotë në Facebook:
