Kandidati për deputet në Kuvendin e Kosovës nga radhët e PDK-së, Elmi Reçica ka publikuar një video ku siç pretendohet shihen persona duke manipuluar votat e mërgatës.

Reçica në postimin e tij në Facebook tha se kjo është një goditje e çdo qytetari për votë të ndershme, transmeton lajmi.net.

Në prapavijë tek kjo video në ekran shihet lideri i VV-së, derisa qytetari nga mërgimi mbush plot fletëvotime që ka përpara.

Ja postimi i tij:

“Pamjet e publikuara ku shihen persona duke manipuluar votat e mërgatës janë një goditje në të drejtën e çdo qytetari për një votë të ndershme.

Institucionet përkatëse duhet të reagojnë menjëherë, të identifikojnë përgjegjësit dhe të sigurojnë se manipulimi i votës nuk do të tolerohet.

Vota është e shenjtë, dhe çdo përpjekje për ta deformuar atë është tradhti ndaj qytetarëve dhe perspektivës së vendit tonë”, ka shkruar Reçica.

Kujtojmë që zgjedhjet parlamentare në territorin e Kosovës mbahen me 9 shkurt./Lajmi.net/