Ish-futbollisti i Kombëtares Shqiptare, Mërgim Mavraj është deklaruar pas kandidaturës së tij për deputet i “Listës për Familje”.

Përmes një reagimi në Facebook, ai thotë se po jetojmë në një kohë kur familjes po i humbet rëndësia e saj, por është familja ajo që mbi të ndërtohet themeli mbi të cilin ndërtohet çdo e ardhme e suksesshme.

“Të dashur miq, jetojmë në një kohë kur familja – zemra e shoqërisë sonë – po humbet gjithnjë e më shumë nga rëndësia e saj. Por unë jam i bindur: Pa familje të forta nuk mund të ketë një komunitet të fortë dhe as një të ardhme të sigurt për fëmijët tanë. Si lojtar pata nderin e madh të mbaja vlerat dhe flamurin tonë lart në fushën e futbollit. Por përgjegjësia ime nuk mbaron me karrierën time aktive. Tani, pas futbollit, dua t’i jap diçka të re vendit tim, vlerave të mia dhe institucionit të familjes”, ka shkruar Mavraj.

“Dikush mund të mendojë se tani “ka kaluar nga futbollisti në politikan”. Por unë dua të jem shumë i qartë: Asnjëherë nuk jam definuar vetëm si futbollist dhe nuk do të definohem as si politikan. Titujt janë të rëndësishëm, por nuk janë thelbësorë për mua. Unë e shoh veten thjesht si dikush që ka përgjegjësinë të nxisë të mirën dhe të luftojë të keqen. Dhe këtë nuk mund ta bëj vetëm – këtë mund dhe duhet ta bëjmë të gjithë së bashku”.

“Familja është themeli mbi të cilin ndërtohet çdo e ardhme e suksesshme. Ajo duhet të rifitojë rëndësinë që meriton dhe të vihet përsëri në vend të parë. Vetëm duke mbrojtur familjen dhe vlerat e saj, ne mund të krijojmë bazën për një të nesërme më të mirë – për çdo individ dhe për shoqërinë në tërësi. Politika nuk duhet të jetë vetëm një temë për të moshuarit. Ajo duhet të angazhojë të rinjtë, sepse ata janë e ardhmja jonë. Ata janë ata që mund ta bëjnë më mirë, që mund të sjellin ndryshime. Është detyra jonë t’u hapim rrugën dhe t’i inkurajojmë ata të shfrytëzojnë mundësitë e tyre”, përfundoi ai.