Kryetari i Partisë Demokratike Sali Berisha, në fjalimin e tij të parë në Parlament që pas heqjes së masës së sigurisë “arrest në shtëpi” ndaj tij, deklaroi se është kthyer “për të udhëhequr opozitën drejt fitores”.

“Po mbaheni me shpirt ndër dhëmbë. Unë erdha, ju e dini vetë. E shoh çehren që ju ka rënë. Edi Rama mendoi se e realizoi ëndrrën e tij që të mos shihte më në këtë sallë Sali Berishën. I bëtë llogaritë gabim sepse nuk ishte viti 1946. Është e vërtetë se ju kishit mbështetjen e atyre që ishin larguar nga parimet e mëdha të lirisë së kombit amerikan dhe ndiqnin agjendën e George Sorosit, këtij armiku të egër të kombit amerikan. Pra, ju në 21 dhjetor votuat për të kompletuar grushtin e shtetit ndaj opozitës shqiptare. Por, sot, ja ku jam. Vij këtu për të udhëhequr opozitën drejt fitores”, tha Berisha, shkruan A2 CNN.

“Janë shpenzuar miliona me lobime kundër një opozite pa të cilën demokracia nuk mund të ekzistojë. Sot ju jeni të dështuar në mënyrën më përfundimtare”, shtoi kreu i Partisë Demokratike.