Ushtarët e FSK-së kanë kryer stërvitje bashkë me ushtarët amerikan dhe gjerman të KFOR-it për njohje me Helikopterin UH-60M Blackhawk.

KFOR përmes një postimi në Facebook, ka shkruar se trajnimi lejon njësitë tokësore dhe ekipet e fluturimit të kuptojnë më mirë nevojat dhe kapacitetet e misionit të njëri-tjetrit.

“Ushtarët e Forcave të Kosovës vazhdojnë të punojnë së bashku dhe të qëndrojnë të përgatitur për ‘air insertion operations’, qoftë për reagime emergjente apo patrullime të vijës kufitare administrative”.

KFOR-i përsëriti se vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, “në çdo kohë dhe në mënyrë të paanshme”.

KFOR-i shtoi se punon në koordinim të ngushtë me Policinë e Kosovës dhe EULEX-in në rolet e tyre përkatëse si reagues të sigurisë.