Ministri i Financave, Punës dhe Transfereve Hekuran Murati dhe deputetja e Lidhjes Demokratike të Kosovës, Hykmete Bajrami në vazhdimësi po reagojnë kundër njëri tjetrit.

Ministri Murati dje ka njoftuar se për 4 vitet e fundit, depozitat e ekonomive familjare janë shtuar për 1.51 miliardë euro e ndaj këtij njoftimi ka reaguar deputetja Bajrami.

Bajrami përmes një postimi në Facebook, ka shkruar se këto depozita nuk do të thonë rritje e ekonomive familjare pasi që sipas saj bazuar në të dhënat e Bankës Qendrore të Kosovës mbitërheqjet në banka janë rritë nga 1 miliardë e 682 milionë euro sa ishin për vitin 2020, shkruan lajmi.net.

Bajrami ka konsideruar se për shkak të çmimeve të larta një shoqëri është e zhytur në borxhe.

“E vërteta qëndon krejt ndryshe, rritja e çmimeve dhe mungesa e çfarëdo mase nga e qeverisë e ka shtyer një popull të tërë të zhyten në borxhe dhe po një pjesë e qytetarëve që kanë gjendjen finanaciare pak më të mirë po i ruajnë paratë e tyre në banka, sepse po kursejnë, janë të kufizuar në shpenzime, s’po investojë ngase ka mungesë të sigurisë ekonomike dhe jo vetëm”, ka shkruar Bajrami.

Pas kësaj deklarate të Bajramit, ka reaguar përsëri ministri Murati i cili po e shfrytëzon Facebook-un për reagime të tilla ndaj opozitës.

Ai e ka quajtur deputetën Bajrami “redaktore të portaleve” derisa kërkon nga një ekonomist i LDK-së që t’i tregoj se ku ka gabuar me këtë grafikon.