Ministri i Financave, Punës dhe Transfereve, Hekuran Murati, ka thënë se politikat e Qeverisë për punësimin e të rinjeve janë duke funksionuar.

Përmes një postimi në Facebook, Murati ka shkruar se “gjithsej të rinj të punësuar të moshës 15-24 në fillim të vitit 2021 ishin 28,293 persona. Kurse në fund të korrikut 2023, numri i tyre është mëse dyfishuar në 60,884 persona. Pra për 30 muaj, janë mbi 32 mijë të reja e të rinj që kanë filluar punën“.

Ai thotë se diçka e  tillë nuk ka ndodhur kurrë në historinë e shtetit.

Përpos që është rritur punësimi për rininë, sipas Muratit, është rritur edhe përfshirja e grave në treg.

”Pra, jo vetëm që është rritur punësimi i të rinjve si asnjëherë më parë, por kemi edhe rritje të pjesëmarrjes së vajzave e grave në tregun e punës“, ka thënë ndër tjerash Murati.

Kujtojmë që ditë më parë Agjencia e Statistikave të Kosovës nxjerri raportet e saja periodike.

Dhe nga kjo rezulton se në tre mujorin e dytë të këtij viti, eksportet e Kosovës u tkurrën për afro 11%.

Postimi i plotë:

Synimi ynë kryesor si Qeveri është shtimi i vendeve të reja të punës, e në veçanti, punësimi i të rinjve dhe grave, që çdoherë kanë qenë të nën-përfaqësuar në tregun e punës.

Për të arritur këtë, kemi ndërmarrë veprime e masa që përfshijnë:

Masa 1.3 për punësimin e grave

Masa 1.4 për punësimin e rinisë

Masa 2.1 për mbështetjen e prodhuesve dhe bizneseve në pronësi të grave

Superpuna

Si dhe shumë masa tjera, rezultati i të cilave është i padiskutueshëm.

Dhe tashmë kemi edhe dëshmi se politikat tona po funksionojnë.

E kjo dëshmohet më së miri nëse shikoni grafikun më poshtë që paraqet numrin e të rinjve të punësuar, nëpër muaj, që nga janari 2021 e deri në korrik 2023, sipas të dhënave administrative të tregut të punës.

Gjithsej të rinj të punësuar të moshës 15-24 në fillim të vitit 2021 ishin 28,293 persona. Kurse në fund të korrikut 2023, numri i tyre është mëse dyfishuar në 60,884 persona. Pra për 30 muaj, janë mbi 32 mijë të reja e të rinj që kanë filluar punën.

Diçka e tillë nuk ka ndodhur asnjëherë në historinë e shtetit tonë.

Sepse asnjëherë më parë nuk ka pasur kaq shumë masa e mbështetje për punësimin e të rinjve sikurse me Qeverinë tonë.

Një gjë tjetër që vërehet, është se nga të gjitha punësimet e reja që kanë ndodhur gjatë kësaj periudhe, gjysma e punësimeve të reja janë vajza. Kësisoj, duke e përmirësuar edhe raportin gjinor të të punësuarve nga 62:38 djem VS vajza, në 56:44 djem VS vajza.

Pra, jo vetëm që është rritur punësimi i të rinjve si asnjëherë më parë, por kemi edhe rritje të pjesëmarrjes së vajzave e grave në tregun e punës.

Qeveria për rininë!