SPRTK e konteston ligjshmërinë e këtij vendimi të Bordit të RTK-së, duke u bazuar në faktin se janë shkelur rregullat procedurale, respektivisht nuk është respektuar dispozita e nenit 32, paragrafi 3 të ligjit të RTK-së, Nr.04/L-046, e cila e përcakton qartë se drejtori i përgjithshëm emërohet me 2/3 e votave të anëtarëve të Bordit.

Duke pasur parasysh rolin tejet të rëndësishëm të RTK-së në informimin e qytetarëve, Kuvendi i Kosovës ka kërkuar një kualitet më të lartë të votës për zgjedhjen e drejtorit gjeneral të saj, dhe asnjë Bord nuk ka të drejtë ta ndryshojë kërkesën ligjore të Kuvendit për shumicën e kualifikuar.

“Ne presim nga Gjykata që rastin ta trajtojë me prioritet për faktin se kemi të bëjmë me pozitën më të lartë udhëheqëse të Transmetuesit të vetëm Publik në vend, influenca e të cilit në opinionin publik është e lartë. Përveç kësaj, drejtori gjeneral i RTK-së është përgjegjësi kryesor për menaxhimin e rreth 15 milionë eurove të buxhetit vjetor të RTK-së, mjete këto të grumbulluara kryesisht nga taksat e qytetarëve të vendit tonë”, thuhet në njoftim.

SPRTK kërkon nga drejtuesit e RTK-së, që deri në vendimin e Gjykatës të përmbahen nga procedimi i konkurseve të reja dhe çdo lloj veprimi tjetër që do të mund të ketë pasoja të pariparueshme dhe shumëfishë më të mëdha për Transmetuesin Publik.

Në ditët në vijim, Sindikata thotë se do të ushtrojë kallëzim penal për keqpërdorim të pozitës zyrtare ndaj anëtarëve të Bordit të RTK-së, të cilët e kanë miratuar këtë vendim të kundërligjshëm. /Lajmi.net/