Zyrtarë të Policisë së Kosovës në Mitrovicë, kanë konfirmuar për lajmi.net, që protesta një protestë e tillë do të mbahet nesër por sipas tyre për organizmin e saj askush nuk ka kërkuar leje.

Besim Hoti, zëvendëskomandant në stacionin e veriut të Mitrovicës ka thënë për lajmi.net, që policia është njoftuar përmes pankartave që kjo protestë do të mbahet.

“Policia e Kosovës është në dijeni që do të organizohet një protestë e mundshme për nesër në orën 10:00, sigurisht që PK-ja këtë e ka kuptuar përmes disa njoftimeve publike që janë bërë në qytet”, tha Hoti në një deklarim për lajmi.net.

Sipas tij, policia nuk e di me saktësi kush janë organizatorët e protestës por Hoti thotë që nuk presin eskalim të situatës.

“Nuk e dimë saktësisht cilët janë organizatorët me emra, por sidoqoftë kjo protestë i referohet kërkesave të ngjashme sikurse protestës së më hershme të mbajtur ditë më herët para objektit të gjykatës dhe ndërtesës së EULEX-it në veri të Mitrovicës. Sidoqoftë ne do ta përcjellim për së afërmi këtë protestë. Nuk ka asnjë indicie për çfarëdolloj eskalimi, kërkesa është shumë e qartë ata do paraqesin përkrahjen e tyre për një kërkesë”, ka deklaruar Hoti.

Ndërkohë, i dyshuari për krime lufte, Oliver Ivanoviq, ka shtatë ditë që ka hyrë në grevë urie me kërkesë kryesore që lirohet nga masa e paraburgimit për tu mbrojtur në liri.

Gjatë ditës, lajmi.net, ka provuar të marrë edhe një deklaratë nga Qeveria e Kosovës, por një gjë e tillë ka qenë e pamundur.