Edhe pse 50 për qind të peshës së rezultatit përfundimtar e kishte në dorë publiku, ky raport nuk është respektuar nga shtetet europiane. Siç duket nga këto televotime, shihet se juria profesioniste nuk i ka marrë fare parasysh preferencat e publikut, meqenëse votat e tij për këngëtaren tonë kanë qenë jo të pakta: “Juria profesioniste e ka shkatërruar Shqipërinë, e cila renditet në vend të 9-të, falë mbështetjes së të gjithë shqiptarëve që jetojnë në diasporë”, – shkruhet në faqen zyrtare të Eurovisionit.

Duke parë në faqen e Eurovisionit votimet e bëra nga publiku dhe juria e çdo shteti për Shqipërinë, rezulton se Elhaida Dani duhet të ishte renditur në vend të 9-të dhe jo të 17-të, siç rezultoi në fund të garës. Pra, në rast se Eurovision-i do të shpallte renditjen përfundimtare vetëm përmes votave të publikut, Shqipëria do të renditej e 9-a me 93 pikë. trasnmeton revistaclass.com

Me sa duket, këngëtarja shqiptare nuk ka rezultuar e preferuar nga juria profesioniste e këtyre shteteve, e cila ka përmbysur votën e publikut. Por më e keqja nuk mbaron me kaq. Sipas komunikimit të fundit të bërë publik nga organizatorët e Eurovisionit, pritet që Shqipërisë, por edhe disa shteteve të tjera, t’u hiqen votat e Maqedonisë dhe Malit të Zi, pasi këto shtete nuk respektuan raportin 50 me 50, por pasqyruan vetëm votën e publikut, pa marrë parasysh atë të jurisë profesioniste.

Siç shihet nga tabela e votimeve, diaspora shqiptare ka votuar maksimalisht, por asgjë nuk arriti dot me votën e saj.