Trajneri i Atletico Madridit, Diego Simeone ka paralajmëruar rivalin e qytetit Real Madrid, se futbollistët e tij janë të gatshëm të vdesin në fushë, në prag të ndeshjes së kthimit në kuadër të Copa del Rey.

Atletico ka avantazh 2:0 nga dueli i parë, por Los Blancos kanë paralajmëruar se do të tentojnë të përmbysin disavantazhin në Santiago Bernabeu.

“E dimë se jemi më të dobët se Reali dhe Barcelona, por vetëm për shkak të futbollistëve që i kanë ata”, deklaroi Simeone gjatë një interviste për “Canal+”.

“E di se futbollistët e mi do të luajnë mirë, janë të gatshëm të vdesin për mua dhe për Atleticon. Nuk kanë frikë nga vdekja. Kam djem të mrekullueshëm në skuadër, e di se do të kemi sukses sepse janë luftëtarë”, u shpreh ai.