Kryeministri Isa Mustafa ka pritur sot në takim shefin e Misionit të EULEX-it në Kosovë, Gabriele Meucci, me të cilin është diskutuar për gjendjen aktuale politike në vend.

Mustafa ka vlerësuar përkrahjen që misioni i EULEX-it ka dhënë në forcimin e rendit dhe ligjit në Kosovë.

“Gjatë këtij takimi, vëmendje e veçantë i është kushtuar vazhdimit të procesit për krijimin e Gjykatës Speciale, reformave në infrastrukturën ligjore, në procesin e liberalizimit të vizave dhe sundimit të ligjit”.

“Kryeministri Mustafa dhe Meucci u pajtuan për thellimin e mëtejmë të bashkëpunimit mes Qeverisë së Kosovës dhe Misionit të EULEX-it, në funksion të fuqizimit të sundimit të rendit dhe ligjit”, thuhet në njoftimin e lëshuar nga Zyra e Kryeministrit.