Komisioni Qendror i Zgjedhjeve ka qenë një nga institucionet më të angazhuara në vend gjatë vitit 2025, kjo pasi në Kosovë u mbajtën plot katër palë zgjedhje.

Qytetarët thuajse kishin takime të përditshme me mbledhjet e KQZ-së, e deklarimet që bëheshin për organizimin, e më pas zhvillimin e zgjedhjeve.

Viti nisi me zgjedhjet nacionale të 9 shkurtit, të cilat ndonëse u mbajtën, më pas u publikuan rezultatet dhe u përfunduan të gjitha afatet kushtetuese, nuk sollën rezultat. Pas tyre u mbajtën zgjedhjet lokale të 12 tetorit, ato të balotazhit të 9 nëntorit, e të fundit zgjedhjet e parakohshme nacionale të 28 dhjetorit.

Këto zgjedhje të fundit u mbajtën pasi Qeveria e Kosovës nuk  u formua dot, as pasi këtë e provuan dy të mandatuarit nga Presidentja, Albin Kurti e Glauk Konjufca.

Për shkak të numrit të këtyre zgjedhjeve, KQZ “u detyrua” të mblidhej shpesh. Kryesuesi i KQZ-së, Kreshnik Radoniqi, mblidhte shumë shpesh anëtarët e këtij komisioni, të cilët vinë nga parti të ndryshme, kanë bindje politike të ndryshme e mendime të ndryshme që shpesh përfundonin në konflikte verbale mes anëtarëve.

Në KQZ përveç Kreshnik Radoniqit, anëtarë janë Sami Kurteshi dhe Alban Krasniqi nga VV, Arianit Elshani dhe Ilir Gashi nga PDK, Sami Hamiti i LDK-së, Muharrem Nitaj nga AAK, Gordana Laban nga Lista Serbe, Mufera Srbica Sinik nga KDTP, Almir Saiti nga NDS dhe Alfred Kinolli nga Partia Rome e Bashkuar e Kosovës.

Nga 10 anëtarë gjithsej dhe kryesuesi, një nga ta është më i zhurmshmi.

Bëhet fjalë për “Kryeqendrën” e KQZ-së, Sami Kurteshi i Lëvizjes Vetëvendosje i cili e shfrytëzoi çdo mbledhje të KQZ-së për t’i sulmuar mediat, e për t’ua vështirësuar punën atyre.

Më 12 mars të këtij viti, në Qendrën e Numërimeve dhe Rezultateve, vetë Sami Kurteshi i quajti “media kriminale”, gazetarët që ishin aty.

“Ju jeni media kriminale, të vrasësve me pagesë”, u shpreh Kurteshi para gazetarëve.

Ai biles të njëjtën ditë, u ishte drejtuar gazetarëve që nuk kishin të drejtë ta xhironin, ndonëse i njëjti ndodhej në një vend publik, dhe gazetarët e kameramanët ishin akredituar nga KQZ për të vëzhguar procesin e numërimit të votave.

Në lidhje me këtë deklaratë të tij, menjëherë kishte reaguar Asociacioni i Gazetarëve të Kosovës, të cilët e kishin konsideruar këtë deklaratë si të papërgjegjshme, të papranueshme dhe të rrezikshme.

“Akuza e tillë, e paprecedent ndaj një medie, nga një zyrtar i lartë i partisë në pushtet, jo vetëm që cenon lirinë e shtypit, por rrezikon edhe sigurinë e gazetarëve. AGK-ja i bën thirrje Lëvizjes Vetëvendosje që urgjentisht të sigurojë që përfaqësuesi i saj në KQZ të mos pengojë punën e gazetarëve dhe të përmbahet nga gjuha fyese dhe kërcënuese ndaj mediave. Sulmet verbale ndaj gazetarëve janë të papranueshme dhe cenojnë seriozisht lirinë e medias në Kosovë”, kishte thënë AGK në këtë reagim.

Por, Kurteshi nuk e kishte lënë me kaq. Ai më pas kishte reaguar duke ofenduar rëndë edhe AGK-në.

Ai, AGK-në e kishte quajtur si “Aleancë të Grupeve Kriminale”.

“Viktimizimi i kriminelëve të mbështjellur me velon e “gazetarit”, në mesin e tyre të vrasësve me pagesë të dinjitetit njerëzor, është “lot krokodili”. Kriminelët vrastarë të llojit e sojit të tillë, duke u frikësuar nga hija e tyre e përbindëshme vrastare që shohin në pasqyren mëngjesore, rrezikimin e sojit të tyre e pasqyrojnë te të tjerët. Qëllim dhe shpërfaqje e neveritshme, e pështirë kutërbuese. Askush, në asnjë rast, nuk i përfillë, ashtu siç kërkojnë me ngulm, e lëre më t’i rrezikojë. Halli i sojit e sorollopit të tyre nuk është as rrezikimi, as pengimi, as “gjuha fyese”, as kërcënimi, as cenimi i “sigurisë së gazetarëve” e as i “lirisë së medias”. Halli i tyre është pikërisht se nuk e durojnë Lirinë e Mendimit ndryshe dhe Lirinë e Shprehjes, monopolin e të cilave e gjakojnë për qëllime kriminale. Brenga e shqetësimi i tyre thelbor është se narracioni i tyre kriminal e vrastar nuk po arrin të krijojë diskurs publik. Kaq! Për AGK nuk ka respekt!”, kishte shkruar Kurteshi në Facebook, postim i cili vazhdon të jetë ende i publikuar në profilin e tij.

Kurteshi i kishte reaguar edhe Rrjetit të Grave Gazetare të Kosovës, të cilët ishin shprehur të shqetësuar pasi Kurteshi iu ishte drejtuar me shprehjen “ta hangsha loçkën”, gazetares së Nacionales, Besarta Hotit.

Ai edhe në këtë reagim, i kishte quajtur “kriminelë”, mediat e gazetarët.

“Gënjeshtra e parë, unë nuk i kam dhënë kurrë intervistë një gazetareje me emrin e lartëcekur, të cilën as e kam njohur dhe as e njoh edhe sot. Aq më pak lejoj të “intervistohem” për një altoparlant kriminal përbaltës e dezinformues me titullin “Nacionale”. Përcjellja/ndjekja nga një grua e re me mikrofon në dorë dhe kamerë, as është gazetari dhe as intervistë, por është veprim i poshtër me qëllim përbaltjeje e denigrimi. Gënjeshtra e dytë, e neveritshme, fyese e me qëllim denigrues, është shprehja “ta hangsha loçkën,”. Se unë ju paskam drejtuar me një shprehje të këtillë, është gënjeshtër e llojit më të poshtër që përdorë RRGGK, një përpjekje skajshmërisht e ulët për cenim të dinjitetit të njeriut. Kurrë nuk e përdor unë këtë shprehje me njerëzit e panjohur. Unë kam njerëzit e mi të dashur, loçkat e zemrës sime! Por personi i cituar me emër e mbiemër nga RRGGK, nuk i takon këtij rrethi të njerëzve, sikurse edhe asnjë nga të RRGGK”, kishte shkruar Kurteshi.

Ai u kap edhe me paratë e të ardhurat e gazetarëve e pronarëve të mediave, që thotë se i kanë marrë nga burime të kriminalizuara.

“E sa për “kulturë[n] misogjiniste dhe seksiste”, që përpiqet ta vë në fjalorin dhe qëndrimin tim RRGGK, unë kujtoj se pikërisht RRGGK, me shërbimin që i bën kapitalit financiar nga krimi i organizuar i padronëve të tyre kriminelë, është bartëse besnike e “kulturë[s] misogjiniste dhe seksiste”, e mendësisë shtypëse patriarkale ndaj gruas në përgjithësi, që ndihmon për të “krijuar një mjedis të pasigurtë për gazetaret.” në veçanti. Kapitali financiar nga burime të kriminalizuara, si kategori ekonomike publike e mbizotëruar absolutisht nga burrat e kriminalizuar, të cilit i shërbejnë me apo pa vullnet e dëshirë, edhe “gazetaret” e lidhura në e nga RRGGK, është thelbi dhe burimi i “kulturë[s] misogjiniste dhe seksiste”, i shtypjes patriarkale të gruas, që “krij[on] një mjedis të pasigurtë për gazetaret.” Për fund, si gazetare që e konsiderojnë veten, le të hulumtojnë burimin dhe prejardhjen e kapitalit/mjeteve financiare të cilit i shërbejnë, ndoshta ndërgjegjësohen sadopak për “kulturë misogjiniste dhe seksiste” që  “krij[on] një mjedis të pasigurtë për gazetaret.”, kishte shtuar Kurteshi.

Kurteshi kishte “humbur kontrollin” në gjuhën që përdorte edhe me 1 qershor. Ai “ripërtypës të jashtëqitjeve të UDB-së”, e “vrasës me pagesë” i kishte quajtur tre gazetarë në Kosovë, Ilir Mirenën, Lirim Mehmetajn e Berat Buzhalën.

“Tërbimi i këtyre vrasësve, i bosave të tyre dhe i bashkëvrasësve, bëhet në emër të gazetarisë dhe lirisë së shprehjes, krejt nën mbrojtjen e Aleancës së Gupeve Kriminale dhe në koordinim e bashkëveprim të ngushtë me krimin e organizuar institucional brenda prokurorisë së shtetit. Këtë punë të përbashkët të këtyre vrasësve me pagesë dhe prokurorisë, fort e qartë e dëshmoi arrestimi i gazetarit Nexhat Behluli nga Lugina e Preshevës për shkak të guximit të tij për zbulimin e rrënjëve të bashkëpunimit të vrasësve medialë me pagesë në Kosovë me bosat e tyre të UDB-ës. Lufta e UDB-ës kundër shqiparëve as ka filluar dhe as përfundon tash e këtu e me këta vrasës. Jashtëqitjet i prodhon ajo, e ripërtypësit e tyre i përzgjedhin caqet dhe viktimat „rastësisht“. Por, një është e sigurtë, luftën e kanë humbur, ripërtypjen nuk ua ndalim”, kishte shkruar Kurteshi në një postim në Facebook.

Kurteshi është ftuar nga Policia e Kosovës për intervistim, pasi i njëjti i kishte akuzuar për “vrasje me pagesë” gazetarët në Kosovë, por që përmes një postimi në Facebook, kishte deklaruar se nuk kishte shkuar të intervistohet.

“Sulmuesit vrasēs me pagesē po kērkojnē publikisht mbrojtje nga viktima, duke i paraqitur viktimat si sulmues! Kēto janē praktika jugosllave tē njohura mirē nga ne, tē cilat ende i pērdorē Serbia sot. Mirēpo, nuk ka teknikē gjyqēsore qē mund ta normalizojē kētē teknikē perverze, megjithē pērpjekjet nga Prokuroria e Prishtinēs”.

“Fushatë kriminale” e “vrasës me pagesë”, i kishte quajtur Kurteshi edhe mediat që kishin publikuar grantet e shumta që Fitore Pacolli e VV-së iu kishte dhënë përmes Ministrisë së Bujqësisë familjarëve të saj.

“Fushatat kriminale të vrasësve profesionalë me pagesë, të strukur në të ashtuquajturat „media“, që në të vërtetë janë janë altoparlantët e veasësve me pagesë, si „klan“-i i serbisë, „nacionale“, albanianpost, t7, ekspress, dukagjini me ndihmën e opozitës PLAS, kundër Lëvizjes Vetëvendosje, po vazhdon me intensitet të shtuar. Pas fushatave përbaltëse „mediale“ kunder Albinit, Glaukut, Rozetës, Liburnit, Albulenës, Xhelalit, Martinit, Artanës, Hysenit, Sarandës etj. tani kanë ndërruar taktikën. Tani, në përcjellje të altoparlantëve të krimit medial, si klan-i i serbisë etj., kanë filluar të organizojnë sulme fizike publike, me fyerje, sharje, kanosje kundër grave të LVV, me burreca me mjekërr e kravatë, që si qenë të tërbuar të zgjebosur, me lehje të qartura u sulen grave, me qëllim frikësimi”, kishte shkruar Kurteshi.

Ai biles kishte akuzuar mediat se kanë për qëllim shndërrimin e hapësirës publike në hapësirë të ndaluar për anëtarët e VV-së.

“Natyrisht, këtë e bëjnë me miratimin nga prokuroria e shtetit që fshehurazi, e shpeshherë edhe hapur, duke mos vepruar, apo edhe duke vepruar sipas porosive të bosave, simpatizojnë me krimin e organizuar të vrasësve me pagesë, edhe pse e pranojnë se ka të tillë në skenën opozitare dhe mediale.\ Këta të gjithë së bashku, komplet lukunija, e dijnë se LVV, dhe sidomos gratë, nuk u frikësohen çjerrjeve, lehjeve, jargavitjeve, sulmeve, kanosjeve ashtu sic nuk u frikësuan nga shantazhet e fshehta dhe shpifjet e linçimet publike nga altoparlantët e krimit apo mikrofoni i kundërligjshëm në Kuvend. Tanimë janë të njohur botërisht të gjithë me emër e mbiemër, edhe vrasësit me pagesë, edhe gërgasësit, edhe vrasësit profesionalë me pagesë, edhe lukunia vepruese e zbatuese. Ata e dijnë ashtu si e dijmë ne, se as nuk na shantazhojnë, as nuk na ndalin, as nuk na frikësojnë dot, megjithë potencialin, jargavitjen, egërsinë, poshtërsinë, veprimet kriminale. Lëvizja Vetëvendosje është populli dhe me popullin, prandaj nuk frikësohet dhe as ndalet dot!”, kishte shkruar Kurteshi përmes një postimi në Facebook.

Ai në gusht të këtij viti, saktësisht më 21 gusht të këtij viti, në mbledhjen e KQZ-së teksa po bisedohej për certifikimin e Listës Serbe, kishte thënë se mediat në Kosovë shkruajnë shqip, por janë përkrahës të Listës Serbe.

“A ja bjen AKI dhe Policia këto dokumente nuk e di unë.  Kjo nuk është luftë mediale, sepse zoti kolegë, unë nuk dalë në asnjë media. Bile refuzoj me komuniku me mediat sepse shumë prej tyre shkruajnë shqip e janë përkrahës të tyre.”, tha Kurteshi.