Kryeministri i Kosovës, Albin Kurti, ka folur rreth materialit arkivor që u gjet në strukturat paralele të Serbisë në Veri e që tashmë është transferuar në Agjencinë Shtetërore të Arkivave të Kosovës.

Kurti përmes një postimi në rrjetin e tij social në Facebook tha se ky aksion erdhi si shkas i bashkëpunimit efikas ndërmjet Policisë së Kosovës dhe Agjencisë Shtetërore të Arkivave të Kosovës.

Po ashtu i pari i Qeverisë tha se materiali arkivor që në masë të madhe i takon periudhës 1943-2000, e që për gjithë këto vite është mbajtur ilegalisht nga komunat paralele dhe strukturat tjera ilegale të Serbisë, pas përpunimit nga Agjencia Shtetërore e Arkivave të Kosovës do të mund të përdoret për nevoja dhe qëllime hulumtuese.