Krasniqi në takime është pritur nga Skender Dreshaj, drejtor i Spitalit të Pejës dhe Hilmi Shala, u.d. drejtor i Spitalit të Gjakovës. Duke folur për investimet e bëra në spitalet e përgjithshme, Krasniqi pohoi se pas investimeve në rezervuarët me oksigjen të lëngshëm, janë shpëtuar shumë jetë pacientësh.

Ai ka falënderuar të gjithë punëtorët e spitaleve që përkundër mbingarkesës, po kujdesen maksimalisht në ofrimin e shërbimeve shëndetësore për pacientët.

Ndërsa drejtorët e spitalit të Pejës dhe Gjakovës, kanë njoftuar se në këto spitale vazhdojnë të trajtohen numër i madh i pacientëve me COVID-19.

Ata kanë falënderuar Krasniqin për investimet e bëra në këto spitale, si në rezervuarët me furnizim të lëngshëm me oksigjen, por mbështetjen dhe përkrahjen e vazhdueshme për spitalet e përgjithshme në furnizim me barna, material shpenzues dhe masa mbrojtëse kundër COVID-19.

Mes tjerash, drejtori i ShSKUK-së, tha se po zbatojnë planin për menaxhim të situatës me COVID-19, në QKUK, por edhe në spitalet e përgjithshme, në të cilat kapacitetet për trajtim të pacientëve me koronavirus janë zgjeruar sipas nevojave që janë paraqitur.

Krasniqi theksoi se njëra nga synimet ka qenë që spitalet të trajtojnë pacientët me COVID-19 dhe mos të ngarkohet QKUK, e kjo është duke u realizuar me sukses.

Duke folur edhe për rëndësinë e vaksinimit, ai ka ftuar të gjithë qytetarët që të vaksinohen, ngase është mundësia e vetme për ta mundur virusin dhe për ta tejkaluar këtë situatë.

Ndryshe, Kosova vazhdon të përballet me numër të lartë të viktimave me koronavirus ku vetëm në 24 orët e fundit si pasojë e kësaj sëmundjeje të rrezikshme kanë humbur jetën 24 pacientë. Numri total i rasteve pozitive në Kosovë ka arritur në 152.169, ndërsa i të vdekurve në 2.629.