Edhe pse ofertat mes veti kanë filluar, përfaqësuesit e partive politike pohojnë se pas zgjedhjeve do të vendosin se si do të jenë koalicionet për qeverisje.

Lidhja Demokratike e Kosovës dhe Aleanca për Ardhmërinë e Kosovës, kanë thënë se Partia Demokratike në pushtet pas zgjedhjeve parlamentare duhet të shkoj në opozitë, ndërsa, nuk e kanë përjashtuar mundësin e koalicionit me ndonjë parti tjetër.

Lëvizja Vetëvendosje, si kriter të parë e kanë përputhjen programore dhe besimin e ndërsjellë gjë për të cilën vlerësojnë se me asnjërën nga partitë politike ekzistuese nuk e kanë.

Aleanca për Kosovë të Re, vlerëson se mund të punojnë me të gjitha subjektet politike në vend, kurse, Partia Demokratike e Kosovës, beson bindshëm që do të jenë fituese sërish dhe do të jenë ata që vendosin se me kë do të jetë në partneritet për qeverisje duke mos e përjashtuar asnjë subjekt. KosovaPress