Rakic kërcënon drejtoreshën e HABITAT-it
Drejtoresha e HABITAT-it, Milena Djeric është kërcënuar nga kryetari i ri i Mitrovicës së Veriut, Goran Rakic, për shkak të planit të saj rreth lirimit të banesave dhe pronave të uzurpuara të shqiptarëve.
Lajme
Djelic kishte planifikuar ditë më parë një aksion për lirimin e rreth 300 banesave të shqiptarëve në veri të Mitrovicës, të cilat po mbahen akoma të uzurpuara nga serbët.
Burime të Kosovapress-it bëjnë të ditur se në lidhje me këtë, ajo kishte dërguar një kërkesë zyrtare në Stacionin e Policisë së Kosovës në veri, me ç’rast ka kërkuar asistencë nga pjesëtarët e Policisë së Kosovës.
Sipas këtyre burimeve, kryetari i Mitrovicës së Veriut, Rakic, pasi është njoftuar me situatën më të re rreth dëbimit të serbëve nga pronat e shqiptarëve në atë pjesë të qytetit, ka ftuar një takim urgjent i cili është mbajtur të martën në ora 10:00 në selinë e të ashtuquajturës ‘Qarku Rajonal i Mitrovicës’, që ndodhet në Lagjen e boshnjakëve në veri.
Mësohet se në këtë takim kryetari Rakic ka kërcënuar drejtoreshën e HABITAT-it për aksionin e paraparë rreth dëbimit të serbëve nga banesat dhe pronat e shqiptarëve.
“Përveç kryetarit Goran Rakic, të pranishëm në këtë takim kanë qenë edhe një përfaqësues i policisë së Kosovës nga Stacioni Veri, drejtoresha e HABITAT-it për veriun, Milena Djeric, si dhe i ashtuquajturi kryetar i Qarkut të Mitrovicës, Vaso Jelic.
“A je normale dhe a je e vetëdijshme për pasojat që mund t’i kesh. Një gjë e tillë nuk guxon assesi të realizohet. Ku po jeton ti?”, janë vetëm disa nga kërcënimet që kryetari Rakic i ka drejtuar në adresë të drejtoreshës së HABITAT-it, e cila sipas burimeve të Kosovapress-it, është detyruar të heq dorë nga ekzekutimi i planit të paraparë.
Në anën tjetër, kryetari i Qendrës Rajonale të KMDLNJ-së në Mitrovicë, Halit Barani, ka bërë të ditur për Kosovapress se posedon shifra të sakta për numrin e shqiptarëve të shpërngulur nga pjesa e veriore e Mitrovicës dhe pronat e tyre që tashmë janë të uzurpuara në atë pjesë.
Sipas tij, shqiptarët e dëbuar nga veriu i Mitrovicës janë detyruar t’i shesin pronat e tyre, që shpeshherë janë blerë nga pronarë prapa të cilëve qëndron Serbia, ndërkaq numri i pronave të mbetura të shqiptarëve është rreth 1 mijë e 400, të cilat vazhdojnë të mbahen të uzurpuara nga serbët.