Në Gjykatën Themelore të Prizrenit, sot po vazhdon procesi gjyqësor ndaj Kryetari të Komunës, Ramadan Muja dhe pesë bashkëpunëtorëve të tij. Seanca gjyqësore ka nisur nga ora 09:00.

Avokati mbrojtës i Mujës, Ruzhdi Berisha konfirmoi për ‘PrizrenPress’ mbajtjen e seancës gjyqësore ndaj Mujës.

Trupi gjykues vitin e kaluar pat marrë vendim që procesi gjyqësor të vazhdojë më 27 janar 2014. Në këtë seancë gjyqësore është paraparë që prokuroria të japë fjalën e saj përfundimtare rreth ngritjes së akuzës që ka bërë ndaj kryetarit të Prizrenit, Ramadan Mujës dhe drejtorëve të tij.

Avokati mbrojtës i kryetarit Muja, Ruzhdi Berisha, ndërkaq pat kërkuar nga trupi gjykues kohë për ta thënë fjalën përfundimtare. Ai preferon që fjalën e tij të bëhet varësisht nga ajo e Prokurorisë.

Berisha në çdo seancë gjyqësore ka hedhur poshtë të gjitha akuzat që Prokuroria e EULEX’i ngarkon klientin e tij, Ramadan Mujën. Sipas tij, nuk ka elemente që veprimet e Mujës përbëjnë vepër penale. Vetë kryetari Ramadan Muja, ndërkaq ka deklaruar se të gjitha vendimet që i ka marrë kanë pasur për bazë interesin e përgjithshëm të qytetarëve të Prizrenit.

Një prokurore e EULEX’it, akuzon kryetarin e Komunës së Prizrenit, Ramadan Muja, Sadik Paçarizin- drejtor i Urbanizmit dhe Planifikimit Hapësinor, Avni Ademajn- ish-u.d së drejtorit të Gjeodezisë dhe Kadastrës dhe Minir Krasniqin- drejtor i Administratës, për kryerjen e veprave penale gjatë ushtrimit të detyrës zyrtare.