Në të gjithë mediat, ditën e djeshme qarkulloi lajmi që policia kishte proceduar penalisht në gjendje të lirë pedagogun Edmond Tupe dhe artistin Robert Aliaj, në mesin e mbi 20 personave.

Procedimi ndaj tyre u bë për tubim të paligjshëm për bllokimin e rrugës në hyrje të Tiranës tek “Zogu i Zi”.

Por, gjatë fjalës së tij në Parlament, ministri i Brendshëm Sandër Lleshaj deklaroi se asnjë pedagog nuk është proceduar penalisht asnjë prej studentëve apo pedagogëve që protestuan në Tiranë apo rrethe të tjera të vendit.

Ministri Lleshaj theksoi gjithashtu se ka nisur procedurat për të zbuluar përgjegjësit në Policinë e Shtetit që kanë përhapur në media informacione të rreme.

Fjala e ministrit Sandër Lleshaj:

E mora fjalën për të bërë vetëm një ndërhyrje të shkurtër që ka lidhje me protestat e studentëve.

Gjatë ditës së djeshme ka qarkulluar që herët në mëngjes një lajm për kinse fillimin e procedurave penale ndaj disa studentëve dhe pedagogëve pjesëmarrës në protestat e zhvilluara këto ditë në vendin tonë.

Ky lajm ka gjetur një jehonë të gjerë mediatike, publike, ka pasur diskutime, elaborime të shumta.

Edhe miq të mi në radhët e profesorëve më kanë shqetësuar dje lidhur me pakuptimësinë e këtij lajmi, ose të kësaj ndërhyrjeje të policisë, dhe në momentin më të parë që gjeta kohë për t’u marrë me ketë çështje, i kam kërkuar Policisë së Shtetit informacione të detajuara rreth kësaj ndërhyrjeje, rreth këtij procedimi dhe për befasinë time të madhe rezulton që lajmi është plotësisht i pavërtetë. Dje nuk ka patur kurrfarë procedimi penal ndaj asnjë pedagogu dhe ndaj asnjë studenti pjesëmarrës në protestat e vendit.

Është lehtësisht e provueshme kjo, në qoftë se dikush do kishte marrë mundimin të interesohej pranë organeve të Prokurorisë apo përmes avokatëve përkatës.

Pra edhe njëherë e përsëris, më shumë për opinion publik: Nuk ka pasur asnjë lloj procedimi penal ndaj asnjë pedagogu apo asnjë studenti pjesëmarrës në protestat e ditëve të fundit, të zhvilluara në Tiranë apo në qarqet e tjera të vendit.

Sigurisht që pas këtij konstatimi kam filluar procedurat për të nxjerrë përgjegjësinë ndaj atyre personave përgjegjës në Policinë e Shtetit, të cilët nuk kanë ndërmarrë hapat e nevojshme për ta përgënjeshtruar këtë lajm, i cili mori vëmendje të madhe publike dhe ngatërroi shumëçka. /tvklan.al