Militantët e ISIS-it këtë organizim e kanë bërë pasi kanë ftuar njerëzit që të dorëzojnë në pikat e caktuara të gjithë sasinë e duhanit dhe të alkoolit, duke i kërcënuar nën parullën “Pendohu ose Vdis”.

Sheriatit, që përmbledh dispozitat fetare islame se si duhet të veprojnë e jetojnë myslimanët, këto produkte i vlerëson si “haram” dhe nuk duhet përdorur, prandaj shkatërrimi i tyre sipas ISIS-it, që ka pushtuar tashmë prej muajsh një pjesë të mirë të Irakut dhe Sirisë, është obligim ndaj Allahut (Zotit).

Sipas portalit të gazetës londineze “Daily Mail”, radikalët, kanë lëshuar pamje në profilet e tyre nëpër rrjetet sociale, ku shihen duke u djegur mijëra pako të cigareve të ndryshme dhe duke thyer shishe të alkoolit, Whisky, Vodka e të tjera në afërsi të Tikritit, që ndodhet jo shumë larg Bagdadit.

Një shkatërrim i këtillë i këtyre produkteve muaj më parë ishte organizuar edhe në qytetin sirian Raqqa, që konsiderohet si qendër e grupit terrorist që pas vrasjes së mbi dhjetë mijë sirianëve dhe irakianëve, shpalli në muajin korrik kalifatin e tij me emrin “Shteti Islamik”.       

“Çdo person që pi duhan ose alkool duhet të jetë i vetëdijshëm se kërkon të bie në një gjendje kllapie dhe kotësisë për të mos iu bindur Allahut”, vlerëson ISIS-i, duke theksuar se prej kohës që Mosuli është nën udhëheqjen e tyre, “në qytet nuk ka drogë, nuk ka alkool dhe asnjë cigare”.