Në fshatin Fitore ai u bë pjesë e një incidenti. I shoqëruar nga kryetari i Komunës, prefektja e Vlorës dhe një grup militantësh të PS ai u ndal në një magazinë rrobash, e përmbytur nga vërshimi i Vjosës. Një banor i fshatit, Isuf Myrtezai, i kërkoi që të vizitonte edhe shtëpitë e tjera dhe jo vetëm ato të militantëve dhe simpatizantëve socialistë. Por kryeministri nuk pranoi.

Myrtezai i kërkoi ndihma konkrete, se kur do të nisë përllogaritja e dëmeve, sa do të jetë vlera e dëmshpërblimit, për shkak se dyshohet që ajo nuk do të jetë e plotë si pasojë e mosshpalljes së gjendjes së emergjencës.

Por i zënë ngushtë nga këto pyetje, në pamundësi për t’u dhënë përgjigje konkrete, kryeministri është nervozuar dhe i është përgjigjur: Mos ke pirë gjë raki? I fyer nga ky qëndrim i kreut të qeverisë banori ka reaguar gjithashtu ashpër duke i thënë: të dh… mu në kryeministër! Debati është zhvilluar larg kamerave. Kur kryeministri ka mbërritur në qendër të fshatit, aty ku ishin edhe gazetarët, mes tyre pati një përplasje të dytë.

Banori i kërkoi sërish ta takonte, por kryeministri refuzoi.

Banori: Zoti kryeministër, një minutë

Rama: Jo! E di pse? Sepse je shumë i ngarkuar.

Banori: I ndave në të nënës dhe të njerkës. E ke lënë popullin këtu në mes… Ik. S’ta kemi nevojën për asgjë. Ik! Largohu! Largohu! Nuk të duam!

Tejet nervoz për faktin se kjo përplasje u zhvillua në prani të kamerave, kryeministri Rama u hyrën në makinën e tij dhe u largua.