Haradinaj: Imazhi i vendit nuk prishet nëse protestohet për mbrojte të sovranitetit
Kryetari i AAK-së, Ramush Haradinaj, sot në tubimet me struktura dhe aktivistë në Ferizaj dhe në Gjilan, ka përsëritur domosdonë e kundërshtimit qytetar të qeverisjes së keqe në vend.
Lajme
Ai ka thënë se dallimi në këtë 17 Shkurt, është se opozita feston duke protestuar, ndërkaq qeveria feston duke mashtruar.
“Ne jemi të vetëdijshëm për sakrificën e brezave deri te pavarësia e Kosovës, por sot nuk jemi mirë dhe sa herë nuk kemi qenë mirë, ne kemi ditur t’i themi jo një gjendjeje të keqe.
“Ne sot jemi të zhgënjyer për mungesën e përgjegjësisë dhe llogaridhënies ndaj shkeljes së Kushtetutës dhe keqqeverisjes”.
“Ne sot jemi të pakënaqur me degradimin e vazhdueshëm të shtetit, ndërkaq qeveria po mundohet të fshihet pas dështimeve të mëdha dhe humbjes së kredibilitetit institucional edhe në ditën e pavarësisë, duke kërkuar prej nesh që të mos e prishim imazhin e shtetit në ditë feste”, ka thënë ai thuhet në komunikatën e AAK-së.
Haradinaj ka thënë se imazhi i vendit nuk prishet kur qytetarët ngrisin zërin kundër shkeljes së Kushtetutës, rrezikimit të sovranitetit e korrupsionit
“Imazhi i shtetit nuk prishet, pse qytetarët e vendit e ngrisin zërin kundër shkeljes së kushtetutës, kundër rrezikimit të sovranitetit e të integritetit, kundër krimit e korrupsionit; me një fjalë kundër degradimit të skajshëm, që kjo qeveri po i bën shtetit”.
“Me këtë protestë, qytetare e paqësore, ne vetëm po i ndihmojmë imazhit të shtetit, duke e dërguar mesazhin e një shoqërie dinamike dhe të përgjegjshme, e cila din t’i thotë të mirës PO e të keqes JO”, ka thënë ai.
Opozita ka shtuar aktivitete e saja nëpër qytetet e Kosovës, për të mobilizuar qytetarët për protestën e 17 shkurtit.