Kryetari i Bashkimit Demokratik (BD), Zafir Berisha, ka vlerësuar se muaji qershor është koha më ideale për mbajtjen e zgjedhjeve parlamentare.

Në një intervistë për “Epokën e re”, Berisha ka thënë se kjo Qeveri duhet të shkojë në shtëpi sa më parë të jetë e mundur. Ndërsa çuarjen në shtëpi të Qeverisë Thaçi ai e planifikon me partinë që pritet të themelohet nesër.

“Jemi duke i bashkërenditur veprimet me iniciativën e Jakupi dhe Fatmirit për të qenë së bashku në zgjedhjet parlamentare. Pra, jemi të interesuar ta faktorizojmë një frymë politike e cila, për fat të keq është duke i munguar Kosovës”.

Për jetëgjatësinë e Qeverisë së drejtuar nga Hashim Thaçi, Berisha e ka fajësuar drejtpërdrejt liderin e LDK’së, Isa Mustafën, dhe atë të AAK’së, Ramush Haradinajn.

”Në Kuvendin e Kosovës vetëm Vetëvendosje ka qenë opozitë. LDK’ja dhe AAK’ja janë dy parti të cilat e kanë mbajtur në pushtet Hashimin”.

“Iniciativës së Jakupi dhe Fatmirit do t’i bashkohen njerëz nga subjektet e ndryshme politike. Natyrisht se do të ketë edhe nga PDK’ja sepse kësaj partie i ka humbur rruga në oborr. Besoj se të pakënaqurit në PDK do t’i bashkohen Jakupit dhe Fatmirit”, është shprehur Berisha për “Epoka e Re”.