Pjesëmarrësit në bisedime, presidenti i Ukrainës, Petro Poroshenko, presidenti rus, Vladimir Putin, ai francez, Francois Hollande dhe kancelaria gjermane, Anglea Merkel, kanë konfirmuar arritjet e marrëveshjes, sipas së cilës, armëpushimi do të fillojë më 15 shkurt.

Marrëveshja, të cilën e kanë nënshkruar edhe rebelët prorusë, përfshinë edhe disa pika të tjera, si tërheqja e armëve të rënda nga zonat e konfliktit brenda dy javësh; lirimi i ndërsjellë i të burgosurve; amnisti për ata që janë përfshirë në luftime; tërheqja e të gjitha forcave të huaja të armatosura, e armëve dhe mercenarëve nga territori ukrainas; dhe çarmatimi i të gjitha grupeve ilegale.

Po ashtu sipas kësaj marrëveshje, Ukraina duhet të krijojë kushte për rifillimin e jetës normale në zonat rebele, me heqjen e kufizimeve; dhe të kryej reforma kushtetuese për të mundësuar decentralizimin për rajonet rebele deri në fund të vitit 2015.

Marrëveshja e arritur pas 17 orë bisedimesh është shumë e ngjashme me marrëveshjen për armëpushim të dakorduar shtatorin e kaluar, e cila u shkelë shumë shpejtë nga të dyja palët.

Presidenti francez, Hollande tha se ai dhe kancelarja gjermane, Angela Merkel, do të kërkojë nga partnerët e tyre të Bashkimit Evropian për të mbështetur marrëveshjen në një takim më vonë të enjten.

Çështjet kyçe të pazgjidhura përfshijnë statusin e Debaltseve, një qytet i mbajtur nga forcat qeveritare, por i rrethuar nga rebelët, ku ditëve të fundit ka pasur luftime të ashpër midis të dyja palëve. .

Po ashtu, sipas presidentit rus, Vladimir Putin, pas marrëveshjes së arritur do të mbahen edhe bisedimet për vetëqeverisje në rajonet Donetsk dhe Luhansk, të cilat separatistët i kishin shpallur të pavarura dhe ku që prej muajit prill të vitit të kaluar kanë humbur jetën mbi 5000 veta.

Putin, duke u prononcuar për televizion shtetëror rus, ka thënë se nata e kualuar nuk ishte edhe aq e mirë, pasi që ka mbetur pa gjumë, porse siç tha ai, mëngjesi solli marrëveshjen dhe ishte i mirë.

Ndërsa presidenti ukrainas, Poroshenko, i cili e kishte akuzuar vazhdimisht Rusinë për bërjen e kërkesave të papranueshme, tha se pavarësisht nga tensioni dhe presioni, Ukraina nuk iu nënshtruar ultimatumeve.

Konflikti në Ukrainën lindore u nxit pas aneksimit të Krimesë nga Rusia, një krahinë tjetër e Ukrainës, akt ky që çoi në tensionimin e marrëdhënieve midis Perëndimit dhe Rusisë, si dhe vendosjen e sanksioneve ndaj kësaj të fundit.