Raporti i auditimit evidenton keqklasifikime buxhetore në vlerë prej mbi 2.1 milionë eurosh, nënvlerësim të pasurisë dhe të llogarive të arkëtueshme, mungesë dokumentacioni financiar për miliona euro pagesa të realizuara përmes përmbaruesve, si dhe vonesa të konsiderueshme në ekzekutimin e obligimeve ndaj operatorëve ekonomikë.

Sipas Auditorit, komuna vazhdon të përballet me probleme të përsëritura në menaxhimin financiar, çka dëshmohet edhe nga fakti se nga 14 rekomandimet e dhëna këtë vit, tetë prej tyre janë të bartura nga auditimet e viteve të kaluara dhe ende nuk janë adresuar në mënyrë efektive, shkruan lajmi.net.

Mbi 2.1 milionë euro të regjistruara në kategori të gabuara

Një nga gjetjet kryesore që ka ndikuar drejtpërdrejt në opinionin e kualifikuar lidhet me keqklasifikimin e shpenzimeve në vlerë prej 2,148,191 euro.

Sipas raportit, këto mjete janë paguar përmes vendimeve gjyqësore dhe urdhrave përmbarimorë që kishin të bënin me zbatimin e kontratës kolektive, por janë regjistruar në kategori ekonomike të papërshtatshme.

Prej kësaj shume, 1,419,064 euro janë paguar nga kategoria e mallrave dhe shërbimeve, ndërsa 729,127 euro nga investimet kapitale.

Auditori vlerëson se kjo ka ndodhur për shkak të planifikimit jo të duhur buxhetor dhe mosrespektimit të kërkesave të Ligjit për Buxhetin dhe qarkoreve buxhetore, duke bërë që pasqyrat financiare të mos paraqesin në mënyrë të saktë natyrën e shpenzimeve publike.

Nënvlerësim i të hyrave dhe pasurisë komunale

Raporti ka zbuluar gjithashtu se Komuna e Prizrenit nuk ka raportuar saktë të gjitha llogaritë e arkëtueshme.

Megjithëse në Raportin Vjetor Financiar janë paraqitur mbi 29.2 milionë euro llogari të arkëtueshme, Auditori ka konstatuar se ato janë nënvlerësuar për 355,098 euro, kryesisht për shkak të mosraportimit korrekt të detyrimeve që rrjedhin nga lejet e ndërtimit.

Parregullsi janë evidentuar edhe në regjistrimin e pasurisë komunale. Shtatë pagesa për projekte infrastrukturore në vlerë prej 839,226 eurosh nuk janë paraqitur fare në pasqyrat financiare si investime në vijim, duke bërë që vlera reale e pasurisë komunale të mos reflektohet saktë.

Mbi 47 milionë euro projekte vazhdojnë të figurojnë si të papërfunduara

Një tjetër gjetje shqetësuese lidhet me investimet kapitale që vazhdojnë të mbahen në evidenca si projekte në realizim, edhe pse disa prej tyre datojnë më shumë se një dekadë.

Sipas Auditorit, në kategorinë “investime në vijim” figurojnë projekte të regjistruara nga viti 2013 deri në vitin 2023 me vlerë totale prej 47,270,834 euro.

Kjo situatë krijon pasqyrë jo reale të gjendjes së pasurisë komunale dhe shmang aplikimin e zhvlerësimit të pasurisë sipas standardeve financiare, ndonëse shumë prej këtyre investimeve mund të jenë tashmë në përdorim nga qytetarët.

Shpërpjesëtime të mëdha në tenderë

Auditori ka ngritur shqetësime serioze edhe për menaxhimin e kontratave publike, duke evidentuar mospërputhje të konsiderueshme ndërmjet peshës së pozicioneve të parashikuara në tender dhe realizimit të tyre në praktikë.

Në kontratën për mirëmbajtjen e drunjve dekorativë me vlerë 210 mijë euro, një pozicion që përbënte 20 për qind të kontratës u realizua vetëm me 7,681 euro, ndërsa një tjetër pozicion që ishte paraparë të konsumonte gjysmën e buxhetit përfundoi duke absorbuar gati 197 mijë euro apo 96 për qind të gjithë kontratës.

Ngjashëm, në projektin për hartimin e kolektorëve kryesorë të qytetit me vlerë 100 mijë euro, studimi i fizibilitetit ishte planifikuar të kushtonte vetëm 5 mijë euro, por në fund arriti vlerën prej 85,094 eurosh, duke përbërë 85 për qind të të gjithë kontratës.

Sipas Auditorit, praktika të tilla cenojnë konkurrencën dhe transparencën gjatë procesit të prokurimit publik.

Miliona euro pagesa pa dokumentacion dhe faturat e papaguara me muaj

Raporti evidenton se për urdhra përmbarimorë të ekzekutuar në vlerë prej 3,884,852 euro nuk është siguruar dokumentacion i mjaftueshëm financiar që do të dëshmonte bazën e pagesave.

Po ashtu, Auditori ka gjetur se komuna ka hyrë në obligime kontraktuale pa siguruar paraprakisht mbulesë financiare, duke krijuar rrezik për detyrime të paqëndrueshme buxhetore.

Problematike mbetet edhe pagesa e faturave. Në 19 raste të testuara, faturat në vlerë totale prej 1,294,286 euro janë paguar me vonesa që varionin nga një ditë deri në 516 ditë pas afatit ligjor.

Komuna nuk arkëton borxhet për lejet e ndërtimit

Auditori ka evidentuar gjithashtu dobësi në menaxhimin e të hyrave nga lejet e ndërtimit.

Në katër raste të analizuara, investitorëve u ishte lejuar pagesa me këste për detyrimet që tejkalonin 2 mijë euro, mirëpo ata nuk i kishin respektuar afatet e pagesës. Pavarësisht kësaj, komuna nuk kishte ndërmarrë masa administrative apo procedura ligjore për arkëtimin e mjeteve të papaguara.

Sipas raportit, mungesa e sanksioneve dhe mekanizmave ndëshkues po ndikon drejtpërdrejt në efikasitetin e mbledhjes së të hyrave komunale.

Përballë këtyre gjetjeve, Auditorja e Përgjithshme ka kërkuar nga kryetari i Komunës së Prizrenit forcimin e kontrolleve të brendshme financiare, planifikim më të saktë të buxhetit, përmirësim të menaxhimit të pasurisë komunale dhe ndërmarrjen e veprimeve konkrete për mbledhjen e borxheve dhe parandalimin e kontraktimit të projekteve pa mbulesë financiare. /Lajmi.net/