Evakuime të reja janë duke u zhvilluar në ishullin Hawai të Maui ndërsa flakët kanë shkuar më pranë qytetit të Kaanapali. Urdhri u zbatua vetëm disa orë pasi banorët e Lahaina aty pranë u lejuan të ktheheshin shkurtimisht për të vlerësuar dëmet në qytetin historik të shkatërruar nga zjarri.

Deri më tani, 80 persona janë konfirmuar të vdekur në atë që është – fatkeqësia natyrore më vdekjeprurëse në historinë e shtetit amerikan. Qindra të tjerë janë raportuar të zhdukur dhe numri mund të rritet ende.

Prokurori i Përgjithshëm i Hawait ka njoftuar një “shqyrtim gjithëpërfshirës” në mënyrën se si autoritetet reaguan ndaj zjarreve, pasi shtohen pyetjet nëse zyrtarët i paralajmëruan banorët mjaftueshëm shpejt, raporton BBC.

Departamenti i Policisë në Maui tha në një postim në Facebook se prioriteti i tyre ishte “të garantonin sigurinë e komunitetit dhe të reaguesve të parë”, pasi ata konfirmuan se evakuimi i Kaanapali ishte në proces.

Ata u paralajmëruan se do të shohin një “shkatërrim siç nuk e kishin parë ndonjëherë në jetën e tyre”, por kjo nuk i pengoi ata që dëshironin të ktheheshin në shtëpi.

Më vonë të premten, rruga u mbyll në të dy drejtimet. Nuk është e qartë pse, por radha për të hyrë në Lahaina është më shumë se një milje.

Disa vendas kanë sugjeruar se ka plaçkitje në qytet. Njerëzit të cilët ishin evakuuar vetëm me disa rroba të bartura mbi shpinë i thanë BBC-së se ishin të shqetësuar se mund të ishte e vështirë të vërtetonin vendbanimin e tyre.

West Maui, ku ndodhen Lahaina dhe Kaanapali, është ende pa energji elektrike dhe ujë. Ekipet e kërkimit janë ende në zonë në kërkim të viktimave nga zjarri.

Roja Bregdetare tha se deri më tani kishte nxjerrë 17 persona të gjallë nga uji pranë portit të qytetit. Të gjithë raportohet se janë në gjendje stabile.