Formacioni i Anglisë për t’u përballur me Shqipërinë është “përhapur” vetëm disa orë para se Thomas Tuchel të marrë drejtimin e ndeshjes së tij të parë pas emërimit të tij.

Tuchel udhëheq Anglinë në një epokë të re, pasi zëvendësoi Sir Gareth Southgate, i cili e la postin e tij pas Europianit 2024.

Para se të presin Shqipërinë në kualifikueset për Kupën e Botës në stadiumin “Wembley”, Tuchel ka lënë jashtë tre lojtarë nga skuadra e tij.

Një raportim i ri duket se ka zbuluar formacionin e parë që trajneri gjerman do të zgjedhë në ndeshjen e tij të parë për Tre Luanët.

Sipas Sami Mokbel, Tuchel pritet të vendosë Marc Guehi në pankinë, që do të thotë se mund t’i japë debutimin ndërkombëtar Dan Burnit, i cili mori thirrjen e tij të parë për Anglinë.

Burn, i cili shënoi në fitoren e Newcastle United ndaj Liverpool në Kupën Carabao, është në linjë për të nisur së bashku me Ezri Konsa të Aston Villa.

Një vendim i madh për të lënë Guehi në pankinë, duke pasur parasysh se ai ka nisur pesë nga gjashtë ndeshjet e Anglisë në Europianin 2024.

Megjithatë, sipas Rob Dorsett të “Sky Sports”, pritet që mbrojtësi i Crystal Palace të nisë nga fillimi.

Ylli i Arsenalit, Myles Lewis-Skelly, gjithashtu mund të bëjë debutimin e tij për Anglinë, pasi duket si zgjedhja natyrale për mbrojtësin e majtë, me Tino Livramento dhe Levi Colwill gjithashtu të disponueshëm.

Sipas raportit të Mokbel, mesfushori i Liverpool, Curtis Jones, ka impresionuar Tuchel me “energjinë” dhe “lëvizshmërinë” e tij në stërvitje këtë javë.

Ai mund të nisë përkrah Jude Bellingham dhe Declan Rice në mesfushë.

Sa i përket sulmit të Anglisë, raportohet se Marcus Rashford pritet të nisë përpara Morgan Rogers dhe Anthony Gordon për të formuar një linjë sulmuese me Phil Foden dhe Harry Kane.

Rashford ka shkëlqyer për Villan që pas largimit nga Manchester United gjatë merkatos së janarit. Ai ende nuk ka shënuar për ekipin e tij të ri, por ka regjistruar katër asistime mbresëlënëse që kur u bashkua në formë huazimi.

Megjithatë, Dorsett duket se sugjeron se ylli i Villas, Rogers, mund të luajë që nga fillimi.

Formacioni i mundshëm i Anglisë kundër Shqipërisë: Jordan Pickford; Kyle Walker, Ezri Konsa, Dan Burn, Myles Lewis-Skelly; Curtis Jones, Declan Rice, Jude Bellingham; Phil Foden, Harry Kane, Marcus Rashford.