Dogana e Kosovës ka zbuluar një rast të mosdeklarimit të mallrave dhe deklarimit të pasaktë gjatë kontrollit doganor në pikën doganore në Merdarë.

Sipas njoftimit të Doganës, gjatë kontrollit të detajuar të një dërgese importi të selektuar për verifikim nga njësitë kompetente doganore, janë evidentuar mallra të padeklaruara si dhe mospërputhje ndërmjet mallrave të deklaruara në dokumentacionin doganor dhe gjendjes faktike të ngarkesës.

“Kontrolli fizik ka rezultuar me zbulimin e sasive të konsiderueshme të mallrave të ndryshme, përfshirë pajisje elektronike, pajisje elektrike, mjete pune dhe produkte të tjera, të cilat nuk ishin deklaruar fare në deklaratën doganore. Po ashtu, janë konstatuar raste të deklarimit të pasaktë të mallrave, ku përshkrimi i produkteve nuk përputhej me natyrën reale të mallrave të importuara”.

“Sipas vlerësimit zyrtar, vlera e përgjithshme e mallrave të padeklaruara dhe të deklaruara në mënyrë të pasaktë arrin rreth 16,377.95 euro, ndërsa struktura e mallrave përfshin ndër të tjera maska për fytyrë, brushë elektrike, pajisje të ndryshme elektrike shtëpiake dhe vegla pune, me sasi të konsiderueshme të konstatuara gjatë kontrollit”, thuhet në njoftim.

Bëhet e ditur se si rezultat i këtyre shkeljeve, shmangia e detyrimeve doganore dhe tatimore është vlerësuar në shumën prej 4,880.62 euro.

Lidhur me rastin, ndaj subjektit importues është iniciuar procedurë për kundërvajtje doganore në përputhje me dispozitat e Kodit Doganor dhe të Akcizave.