Ylli i “Adolescene”, Owen Cooper, e surprizoi Jimmy Fallon gjatë paraqitjes së tij në “The Tonight Show” të martën, kur zbuloi se çfarë nuk i pëlqen absolutisht te Amerika, dhe gjithashtu zbuloi se DiCaprio i dërgoi një mesazh të veçantë.

Aktori 15-vjeçar, i cili aktualisht ndodhet në ShBA, kritikoi hapur ëmbëlsirat dhe ushqimet e lehta amerikane kur Fallon e pyeti nëse po e shijonte kohën e tij në Amerikë.

Owen, i cili vjen nga Cheshire i Anglisë, madje solli me vete një shportë me ëmbëlsira britanike për të provuar se ato ishin më të mira se ato amerikane.

“Një gjë që e urrej në Amerikë – çokollatat dhe karamelet, janë thjesht të tmerrshme. Janë thjesht Cheetos dhe gjëra të tilla. Sinqerisht, i urrej”, tha ai, të cilit Jimmy ia ktheu pyetjen: “Po çfarë keni në Angli?”.

“A ke provuar ndonjëherë Maltesers? Prit – do të sjell një shportë të tërë. Ja çfarë solla – Monster Munch, Maltesers dhe fruta”, u përgjigj Owen.

Më vonë gjatë intervistës, aktori i ri zbuloi gjithashtu se një yll i madh i Hollivudit e kishte kontaktuar së fundmi. Ai tha se Leonardo DiCaprio i la një mesazh video ndërsa ishte me bashkë-yllin e tij Stephen Graham, i cili luan rolin e babait të tij në serial, transmeton telegrafi.

“Stephen Graham më dërgoi një video dje, dhe në të ishte Leonardo DiCaprio i ulur pranë tij dhe duke thënë: ‘Hej Owen, unë jam një fans i madh i Adolescence’. Dhe unë thashë: ‘Çfarë!’”.

Owen vjen nga një vendbanim në qendër të Warringtonit dhe fitoi rolin e Jamie në “Adolescence” midis 500 aplikantëve.

Ishte roli i parë në jetë dhe askush nga familja e tij nuk kishte të bënte fare me industrinë e aktrimit.